ඉන්දියාවේ භාරතීය ජනතා පක්ෂයේ ජ්‍යෙෂ්ඨයෙක්වන ප්‍රියංගු පාණ්ඩේගේ මෝටර් රථය වෙත පිරිසක් වෙඩි තබා තිබෙනවා.
ඔහු භාත්පාරා ප්‍රදේශයේ මෝටර් රථයකින් ගමන් කරමින් සිටියදී ත්‍රිනාමුල් පිරිස බෝම්බ සහ වෙඩි තබා ඇති අතර බටහිර බෙංගාලයේ උතුරු 24 පර්ගානාස් දිස්ත්‍රික්කයේ භාත්පාරාහිදී ත්‍රිනාමූල් කොන්ග්‍රසයට අයත් පුද්ගලයන් පිරිසක් විසින් මෙය සිදුකර ඇති බවයි ප්‍රියංගු පාණ්ඩේ චෝදනා කරන්නේ.
ප්‍රාන්ත අගනුවර පැවති විරෝධතා රැලියක් දී මෙම ප්‍රහාරය එල්ල වී තිබෙනවා.
ඔහු පවසා සිටියේ එම ප්‍රහාරය ඝාතන උත්සාහයක් බවත්, ඔහුගේ වාහනයට බෝම්බ ප්‍රහාර ඇතුළු වෙඩි උණ්ඩ හතක් පමණ එල්ල වූ බවත්ය.මෙම ප්‍රහාරය හේතුවෙන් දෙදෙනෙක් තුවාල ලබා ඇති අතර, ඉන් එක් අයෙකුට බරපතල බවයි වාර්තා වෙන්නේ.
ඔහු මෙම ප්‍රහාරය සම්බන්ධයෙන් ආණ්ඩු පක්ෂයට චෝදනා එල්ල කරන බවයි විදෙස් මාධ්‍ය වාර්තා කරන්නේ.
මෙම ප්‍රහාරය ජ්‍යෙෂ්ඨ බෙංගාල පොලිස් නිලධාරියෙකු ඉදිරියේදීම එල්ල වූ බව භාරතීය ජනතා පක්ෂයේ තවත් ජ්‍යෙෂ්ඨයෙක්වන අර්ජුන් සිං පවසනවා.
එමෙන්ම මෙම ප්‍රහාරය පිටුපස ත්‍රිනාමුල් නායක තරුන් සවු සහ සෝම්නාත් ශ්‍යාම් සිටින බවට අර්ජුන් සිං චෝදනා කළ අතර, අපරාධකරුවන් කාකිනාරා ප්‍රදේශයෙන් ගෙන්වා ගත් බවටයි ඔහු වැඩිදුරටත් චෝදනා කරන්නේ.