කාන්තාවන් දෙදෙනෙකු සමග වන්දනාවේ පැමිණ ශ්‍රී පාද උඩ මළුවෙන් පහළට පැන අතුරුදන් වූ දිනේෂ් හේමන්ත නමැති වයස අවුරුදු 33 ක සූරියවැව ප්‍රදේශයේ පදිංචි තරුණයා සීරිම් තුවාලයක්වත් නොමැතිව හමුවී ඇති ආකාරය ගැන කියන විශ්මය ජනක පුවත මෙසේ හෙළිදරව් කරමු.
හම්බන්තොට සුරියවැව ප්‍රදේශයේ සිට තරුණියන් දෙදෙනෙකු සමග ශ්‍රි පාද වන්දනාවේ පැමිණි දිනේෂ් හේමන්ත නැමති (33) හැවිරිදි තරුණයා ඉකුත් (19) දින උදැසන 10 ට පමණ ශ්‍රි පාද උඩ මළුවේ සිට රත්නපුර මාර්ගය ඔස්සේ පහලට දිවවිත් ආරක්ෂිත වැටෙන් පහළට පැන තිබිණි. ඔහු එසේ පනින ආකාරය ශ්‍රි පාද උඩ මළුවේ සවි කර ඇති ආරක්ෂිත කැමරාවේ සටහන්ව පැවතුනේය.
තරුණයා නිසැක ලෙසම පහළට ඇදවැටුනේය. ඒ ස්ථානය ගැඹුරු හෙළකි. සිව් දෙනෙකුගෙන් යුතු නඩය සිරිපා කරුණාකර තිබුණේ හැටන් පාරෙන් පැමිණ නල්ලතන්නිය හරහාය. කම්පනයට පත් වූ තරුණයා සමග පැමිණි කාන්තාවන් දෙදෙනා සහ දරුවා ද සමග ගොස් නල්ලතන්නිය පොලිසියේ පැමිණිල්ලක් දමා මේ සිද්ධිය වාර්තා කරන්නේය. පැමිණිල්ල දමන්නේ දරුවාගේ මව වූ කාන්තාවය.
එම පැමිණිල්ල අනුව තරුණයා සිරිපා මළුව උඩට ගිය පසු සිටින්නේ සිහිමද ගතියකිනි. ඔහු එකිනෙකට ගැලපෙන්නේ නැති කතා කියූ බවත් මෙසේ මළුවෙන් රත්නපුර පාර පැත්තේ හෙළට පනින්නේ ඒ සිහි මද ගතිය අතරේ දී බවත් කාන්තා පැමිණිල්ලේ සටහන් කරන්නේය.
මේ අතර අතුරුදහන් වු තරුණයා සොයා ලක්ෂපාන යුධ හමුදා කදවුරේ 15 දෙනෙකුගෙන් සමන්විත භට පිරිසක් සහ නල්ලතන්නිය පොලිස් විශේෂ කාර්ය බලකායේ නිලධාරින් පිරිසක් විශේෂ මෙහෙයුමක් දියත් කළේය. තරුණයා පහලට පැන ඇති ස්ථානයේ සිට කඹ ආධාරයෙන් පහලට බැස ඔවුන් මෙහෙයුම ආරම්භ කළේ 20 වැනිදා ය.
ඒ අතර තරුණයාගේ දුරකථනයේ සංඥා අනුව හඹා යන හමුදා කණ්ඩාමට එක්වරම ඒ සංඥා නැති වී ගියේය. සංඥාව පැමිණි ස්ථානයේ ලේ පැල්ලමක් හෝ සැක කටයුතු කිසිම සලකුණක් මතු වූයේ නැත. තරුණයා පැන තිබුණේ රත්නපුර දිස්ත්‍රික් මායිමෙනි. එබැවින් එහි පරීක්ෂණ කටයුතු පැවරී තිබුණේ සිරිපාගම පොලිසියටය.
දුරකථන සංඥාත් නැවතී සියලුම සාධක අතුරුදහන් වී ඇති පසුබිමක මෙහෙයුම පවත්වා ගැනීමට නිමිත්තක් නැති වූයෙන් 21 වැනිදා අදාල මෙහෙයුම නවත්වා දැමීමට ආරක්ෂක අංශ තීරණය කළේය.
ආරක්ෂක අංශවලට යම් සැකයක් ඇති වී තිබුණේ සිහි විකල් වූ තරුණයා රක්ෂිතය දිගේ පහළට පැමිණ පලා යන්නට ඇති බවය.
තරුණයා අතුරුදහන් වී දවස් 05ක් ගතවූ අද උදෑසන ශ්‍රී පාද රක්ෂිතයට ආසන්නයේ නල්ලතන්නිය පොලිස් වසමට අයත් මරේ වතු යායේ රාජමලේ ප්‍රදේශයෙන් විඩාපත් තරුණයෙක් හමුවී තිබිණි. වතු කම්කරුවන් ඔහුව නල්ලතන්නිය පොලිසියට කැඳවාගෙන ගොස් භාර දී ඇත. මේ රක්ෂිතයෙන් පැන අතුරුදහන් වූ සූරියවැව තරුණයා ය.
ඔහු පොලිසියට කියා තිබුණු කතාව කුතුහලය දනවන සුලුය.
ඔහු කියන්නේ ඔහුට මතකයේ ඇත්තේ මළුවට නැග්ග අවස්ථාව පමණක් බවය. එතැනින් පසු කිසිම දෙයක් මතක නැති බවය. යළි ඔහුට මතකය එන අවස්ථාවේ ඔහු සිටිය දියපාරක් අසල වැතිරී බවය. එතැනට පැමිණි ආකාරය ගැන කිසිම මතකයක් නොමැති බව පවසා ඇති තරුණයා තමන් අවට කිසිම කෙනෙක් නොසිටි බව පොලිසියට පවසා තිබිනි.
අනතුරුව ගලාගෙන එන දිය පාරේ වතුර බසින අතට දිය පාර දිගේ තමන් ගමන් කළ බව තරුණයා පවසා තිබිණි. කිසිම ආහාරයක් ලබා ගත්තේ නැති බවත් වතුර පමණක් පානය කළ බවත් ඔහු කීවේය. විඩා එනවිට නිදාගනිමින් වතුර පාර දිගේ එනවිට වතුර පාර ටිකක් පුළුල් වෙමින් ගලාගෙන යනු පෙනුන බවත් අවසානයේ දී තමන් තේවත්තක් දුටු බවත් ඔහු පොලිසියට කියා ඇත.
ඒ තේවත්තේ පුද්ගලයින්ට කතා කළ විට ඔවුන් තමන්ව පොලිසියට රැගෙන පැමිණි බව තරුණයා පවසා ඇත්තේය.
ගැඹුරු හෙළකින් පැන්න නමුත් තුවාලයකුදු නැතිව පුරා දින 05ක් කැලයේ රැඳී සිටිමින් අවසානයේ නල්ලතන්නිය පොලිසිය වෙත යොමු වූ තරුණයා පොලිස් නිලධාරීන් විසින් මස්කෙළිය රෝහලට ඇතුළත් කර ඇත. අනතුරුව එතැනින් ඔහු දික්ඔය මූලික රෝහල වෙත මාරුකර යවා තිබේ.
සිරිපාගම පොලිසිය වැඩිදුර පරීක්ෂණ පවත්වයි.