සුනඛයින් සඳහාවන පළමු සුඛෝපභෝගී ගුවන් සේවය ක්‍රියාත්මක වීමට නියමිත වී තිබේ.
මෙම නව අදහස සමග සුඛෝපභෝගී සුනඛ ගුවන් සේවාව ආරම්භ කරන්නේ Bark Air ගුවන් සමාගමය.
ඒ අනුව සුනඛයන් සහ ඔවුන්ගේ අයිතිකරුවන් සඳහා පමණක් වූ පළමු ගුවන් සේවය බවට Bark Air පත් වන්නේය. සමාගම ලබන මස අවසානයේදී පියාසර කිරීම ආරම්භ කරනු ඇති අතර නිව් යෝර්ක් සිට ගමන් අරඹන ගුවන් සමාගමේ ගමනාන්ත ලොස් ඇන්ජලීස් සහ ලන්ඩන් ය..
Bark සමාගම නිත්‍ය ගුවන් සමාගමක් නොවේ. ඔවුන් ගේ ප්‍රමුඛ ව්‍යාපාරය බල්ලන් සඳහා සෙල්ලම් බඩු අලෙවි කිරීමය. Bark සමාගම – දිගු ගුවන් ගමන් වලදී සතුන්ගේ අත්දැකීම් වැඩිදියුණු කිරීමේ අරමුණින් ගුවන් යානා කුලියට දීමේ සේවාවක් සමඟ හවුල්කාරීත්වයක් ඇතිකරගෙන මෙම Bark Air ගුවන් සේවය ආරම්භ කර ඇත.
සුරතල් සතුන් සමඟ ගුවන් යානයෙන් ගමන් කිරීම සංකීර්ණ අත්දැකීමක් බව Bark සමාගම කියයි. , සමහර විට සුනඛ සුරතලුන් ගුවන් යානයට ඇතුළුවීම ප්‍රතික්ෂේප කරන බවත්, විශාල සුනඛයන් ආසනය යටින් ප්‍රවාහනය කරන පෙට්ටිවලට නොගැලපෙන අතර පැය ගණනක් එහි ගමන් කිරිම සත්ත්වයාට ආතතියක් ඇති කරන බවත් සමාගම පවසයි.
මෙම ගුවන් සේවය තම පළමු ගුවන් ගමන් වාරය 2024 මැයි 23 ආරම්භ කරන අතර මේ වනවිට ගුවන් ගමන් වෙන් කරවා ගැනීම විවෘත කර තිබේ.
මෙම නව ගුවන් සේවයෙන් නිව් යෝර්ක් සිට ලන්ඩන් දක්වා ගමන් කිරිමට ප්‍රවේශ පත්‍රයක මිල ඩොලර් 8,000 කි. දල වශයෙන් රුපියල් ලක්ෂ 24කි. නිව් යෝර්ක් සිට ලොස් ඇන්ජලීස් දක්වා ටිකට් පතක මිල ඩොලර් 6,000 කි. දල වශයෙන් රුපියල් ලක්ෂ 18කි. සුනඛයාට සහ සුනඛ හිමිකරුට මේ ප්‍රවේශපත්‍රයෙන් ගමන් කළ හැකිය.
මේ ඉහළ ගාස්තුවකට හේතුව සමාගම පැහැදිලි කර ඇත. මේ Bark Air එක් ගුවන් ගමනක් සඳහා සමාගම විසින් එක් කරගන්නේ මගීන් 10 දෙනෙකු පමණි. සුනඛ සුරතලුන්ට වඩා හොඳ රැකවරණයක් සහ ඉඩක් ලබාදීම මේ සීමා කිරීමේ අරමුණය. Bark Air වියදම් අඩු කිරීම සඳහා ඉදිරි සැලසුම් ක්‍රියාත්මක කිරීමට තමන් බලාපොරොත්තු වන බව දන්වා ඇත.
ආසන වෙන් කරවා ගත් පසු, ගුවන් සමාගමේ පුද්ගලයෙක් එක් එක් සුනඛයා පිළිබඳ තොරතුරු ලබා ගැනීමටත්, ඔවුන්ගේ අත්දැකීම් වැඩිදියුණු කිරීම සඳහා සංචාරක සැලැස්ම නිර්වචනය කිරීමටත් අයිතිකරු සම්බන්ධ කර ගනු ඇතැයි සමාගම කියයි.
පියාසර කරන දිනයේදී, පුද්ගලයා ලියාපදිංචිය සඳහා ගුවන්ගත වීමට මිනිත්තු 45 සිට 60 දක්වා කාලයකට පෙර තම සුරතලා සමඟ ඉදිරිපත් විය යුුතු බව සමාගම කියයි.
