නාවලපිටිය – දොලොස්බාගේ සිට නාවලපිටිය දක්වා ධාවනය වු ලංගම බස් රථයක් මාර්ගය අසල පිහිටි කන්දක ගැටිමෙන් අනතුරට ලක්ව තිබෙනවා.
එම බස් රථයේ ගමන් ගත් පාසල් ළමුන් තිදෙනෙකු අතුළු මඟීන් 8 දෙනෙක් සහ බස් රථයේ රියදුරා තුවාල ලබා නාවලපිටිය දිස්ත්‍රික් මහ රෝහල වෙත ඇතුලත් කර ඇති බව නාවලපිටිය පොලිසිය පවසනවා.
මෙම අනතුර සිදු වි ඇත්තේ අද (09) නාවලපිටිය දොලොස්බාගේ ප්‍රධාන මාර්ගයේ නාවලපිටිය උඩුවැල්ල ප්‍රදේශයේදියි.
නාවලපිටිය පොලිසිය පවසන්නේ, නාවලපිටිය ලංගම ඩිපෝවට අයත් මෙම බස් රථය ධාවනය වෙමින් තිබියදී බස් රථයේ ඉදිරිපසින් විශාල ශබ්දයක් ඇසී ඇති බවයි.
ඒ සමගම බස් රථය රියදුරුගේ පාලනයෙන් මිදිමත් සමග ඔහු දැඩි පරිශ්‍රමයක් දරා බස් රථය මාර්ගය අසළ පිහිටි කන්දක ගැටිමට සලස්සවා බස් රථය නතර කරගෙන ඇති බව පොලීසිය පවසනවා.
පොලිසිය සඳහන් කළේ බස් රථය අනතුරට පත් වු ස්ථානයේ මාර්ගයේ අනෙක් පස මිටර් 300 ක පමණ අධික බැවුමක් සහිත ප්‍රපාතයක් පිහිටා ඇති බවත්, බස් රථයේ රියදුරා බස් රථය ප්‍රපාතයට පෙරලිම වලක්වා ගනිමින් සිදුවිමට ගිය විශාල අනතුරක් වලක්වාගෙන ඇති බවයි.