මාබිම ප්‍රදේශයේ තිබෙන පෞද්ගලික ආයතනයක අලුත්වැඩියා අංශයේ සේවකයකුගේ ගුද මාර්ගයට විහිළුවට හුළං බටයක් ඇල්ලීමෙන් බඩවැල් පිපිරී එම පුද්ගලයා මරුමුවට පත්වී ඇත.
මීට සම්බන්ධ සේවකයන් දෙදෙනකු සපුගස්කන්ද පොලිසිය මගින් අත්අඩංගුවට ගෙන තිබේ.
සිද්ධියෙන් මියගොස් ඇත්තේ එම ආයතනයේ සේවය කළ පානදුර අලුබෝමුල්ල ප්‍රදේශයේ පදිංචිව සිටි දේශාත් මධුශංක නමැති විසිහතර හැවිරිදි තරුණයෙකි.
ඉකුත් සඳුදා (25 වැනිදා) දහවල් එම ආයතනයේ සේවකයන් දෙදෙනකු විසින් විහිලුවට මියගිය සේවකයාගේ ගුද මාර්ගයට හුළං බටයක් අල්ලා තිබෙන අතර එයින් අසාධ්‍ය තත්ත්වයට පත් වූ ඔහු රාගම රෝහලට ඇතුළත් කර ප්‍රතිකාර ලබමින් සිටියදී පෙරේදා (28 වැනිදා) රාත්‍රියේ මියගොස් තිබේ.
මියගිය සේවකයාගේ මරණ පරීක්ෂණය ඊයේ (29 වැනිදා) රාගම රෝහලේදී පැවැත්වීමට නියමිතව තිබුණේය.
අත්අඩංගුවට ගත් සැකකාර සේවකයන් දෙදෙනා තිස්සමහාරාමය ප්‍රදේශයේ පදිංචි දහඅට වන වියේ පසුවන්නන් වන අතර ඔවුන් මහර මහෙස්ත්‍රාත් අධිකරණයට ඉදිරිපත් කිරීමට කටයුතු කරගෙන යයි