කරන්දෙණිය පොලිස් වසමේ දිවිය ගහවෙල පණලිය ප්‍රදේශයේදී ත්‍රීරෝද රථයකින් ගමන් ගත් පුද්ගලයින් දෙදෙනෙකු විසින් රියදුරට පිහියෙන් ඇන මුදල් කොල්ලකා පළා ගොස් තිබෙනවා.
තුවාලත් රියදුරු ඇල්පිටිය මූලික රෝහලට ඇතුළත් කර ඇති බව වාර්තා වේ.
ඇල්පිටිය නගරයේ පල්ලිය අසල ත්‍රිරෝද රථ ගාලේ කුලී රථ රියදුරකු සමඟ දිවියගහවෙල ප්‍රදේශයට කුලී ගමනක් යාම සඳහා එම පුද්ගලයින් දෙදෙනා ඊයේ (10) දහවල් ත්‍රීරෝද රථයට නැඟ තිබෙන අතර දහවල් 2කට පමණ ත්‍රීරෝද රථයේ ගමන් කළ අය විසින් දිවියගහවෙල පනලිය පාළු ප්‍රදේශයකදී රියදුරුට පහරදී ඔහුට පිහියකින් ඇන තුවාල සිදුකර අසල වූ කුරුඳු ඉඩමකට ගෙන ගොස් ඔහු සතුව තිබූ මුදල් සහ දුරකථනයක් පැහැරගෙන ඇති බව වාර්තා වනවා.
සැකකරුවන් පළායාමෙන් පසු රියදුරු මාර්ගයට පැමිණ එහි ගමන් ගත් පුද්ගලයෙකුට සිද්ධිය පැවසීමෙන් අනතුරුව කරන්දෙණිය පොලීසියට මේ පිළිබඳ දැනුම්දී තිබෙනවා.
අනතුරුව තුවාල ලත් රියදුරු ඇල්පිටිය මූලික රෝහලේ දැඩි සත්කාර ඒකකයට ඇතුළත් කර ඇති අතර මෙසේ තුවාල ලබා ඇත්තේ ඇල්පිටිය කම්පිටියවත්ත ප්‍රදේශයේ පදිංචි 62 හැවිරිදි පුද්ගලයෙකි.