තම සේවකයන්ගේ වාර්ෂික දිරි දීමනා කප්පාදු කළ බව පවසමින් සෙවනගල සීනි කම්හලේ සියලු සේවකයෝ ඊයේ (08) වැඩවර්ජනයක් ආරම්භ කළා.
මේ අතර කම්හලේ වැඩ වර්ජනය හේතුවෙන් තමන් කැපූ උක් අස්වනු ටොන් දහසක් විකුණාගත නොහැකි බව පවසමින් සෙවණගල උක් ගොවීන් කිහිප දෙනෙකුද කම්හල ඉදිරිපිට විරෝධතාවයකද නිරත වූවා.
ඔවුන් දොරටු දෙකම අවහිර කිරීම නිසා ඊයේ (08) දිනයේ පැවතියේ දැඩි නොසන්සුන්තාවයක්.
එම ස්ථානයට ඇඹිලිපිටිය සහකාර පොලිස් අධිකාරි සනත් කුමාර ඇතුළු පොලිස් කණ්ඩායමක් පැමිණ ගොවි විරෝධතාකරුවන්ගේ ගැටලුව කුමක්දැයි විමසීමේදී ඔවුන් තම ගැටලුව ඉදිරිපත්කර තිබෙනවා.
තමන් අනේක විඳ දුක් විදිමින් සකස් කරගන්නා ලද අස්වැන්නට වටිනාකමක් ගැනීමට පැමිණෙන විට මෙලෙස වැඩවර්ජනයක නිරත වීම නිසා තමන් දැඩි කම්පනයට පත්වන බවයි ගොවින් වැඩිදුරටත් පවසා සිටියේ.