අනියම් සම්බන්ධතාවයක් මත ඇති වූ ආරවුලක් හේතුවෙන් කාන්තාවක්ව තියුණු ආයුධයකින් පහරදී ඝාතනය කර තිබේ.
ඊයේ (05) සවස් කාලයේදී එම ඝාතනය සිදුව තිබුණේ, සූරියවැව පොලිස් වසමේ පොල්පහ ප්‍රදේශයේ නිවසකදීය.
එලෙස මියගොස් ඇත්තේ, බැද්දේවැව බටහිර, සූරියවැව ප්‍රදේශයේ පදිංචි 37 හැවිරිදි කාන්තාවකි.
මරණකාරිය හා සැකකරු අතර පැවැති අනියම් සම්බන්ධතාවයක් මත ඇතිවූ ආරවුලක් හේතුවෙන් මෙම ඝාතනය සිදුව ඇති බව පොලීසිය පවසයි.
ඝාතනය සිදුකළ සැකකරු හඳුනාගෙන ඇති අතර, අත්අඩංගුවට ගැනීම සඳහා සූරියවැව පොලීසිය වැඩිදුර විමර්ශන සිදුකරයි.
මේ අතර මාවතගම, උදානගම ප්‍රදේශයේදී වෑන් රථයකින් පැමිණි පුද්ගලයින් දෙදෙනෙකු විසින් යතුරුපැදියකින් ගමන් කරමින් සිටි පුද්ගලයින් දෙදෙනෙකුට තියුණු ආයුධයකින් පහරදී තුවාල සිදුකර තිබේ.
යතුරුපැදියෙන් ගමන්කළ පුද්ගලයින් දෙදෙනාගේ මඟ හරස් කර වෑන් රථය නවතා පොල්ලකින් පහරදී පසුව තියුණු ආයුධයකින් ද පහරදී තුවාල සිදුකර තිබිණි.
තුවාලකරුවන් කුරුණෑගල රෝහලට ඇතුළත් කර ඇති අතර මේ වනවිට ප්‍රතිකාර ලබමින් සිටින බව පොලීසිය පවසයි.
තුවාලකරුවන් අවුරුදු 39 හා 53 වයස්වල පසුවන ගොකරැල්ල ප්‍රදේශයේ පදිංචිකරුවන්ය.