පාස්කු ප්‍රහාරය සම්බන්ධයෙන් වගකීම් පැහැර හැරිය බවට චෝදනා පත්‍ර නිකුත් කළ නිලධාරීන් සම්බන්ධයෙන් වන තොරතුරු තමන් සතුව නැති බව මහජන ආරක්ෂක අමාත්‍යාංශය සිදුකළ ප්‍රකාශයේ සත්‍යාසත්‍ය බව නොබලා එම තීන්දුව ස්ථිර කිරීමට තොරතුරු කොමිසම ගත් තීන්දුව අහෝසි කරන්නැයි ඉල්ලමින් ගොනු කළ අභියාචනයක් අද (11) සලකා බැලුණා.
එහිදී අභියාචනාධිකරණය වගඋත්තරකාර මහජන ආරක්ෂක අමාත්‍යාංශයට පෙබරවාරි 13 වැනිදා අධිකරණයේ පෙනී සිටින ලෙස නොතීසි නිකුත් කරන ලෙසයි නියෝග කර ඇත්තේ.
මරදානේ පිහිටි සමාජය සහ සාමයික කේන්ද්‍රය වෙනුවෙන් එහි පර්යේෂණ කණ්ඩායමේ සාමාජිකයකු වන මාධ්‍යවේදී තරිඳු ජයවර්ධන විසින් මෙම අභියාචනය ගොනු කර තිබුණා. එය අද (11) අභියාචනාධිකරණ විනිසුරු ඩී එන් සමරකෝන් මහතා ඉදිරියේ කැඳවනු ලැබූ අවස්ථාවේදී මෙලෙස නොතීසි නිකුත් කිරීමට නියෝග කෙරුණේ. අභියාචක වෙනුවෙන් නීතිඥ මනුෂිකා කුරේ මහත්මිය සමග නීතිඥ සුරේන් ඩී පෙරේරා මහතා ද අධිකරණයේ පෙනී සිටියා.
තොරතුරු කොමිසමේ තීන්දුවලට එරෙහිව පොදු අධිකාරීන් (තොරතුරු පනත යටතේ වැටෙන ආයතන) අභියාචනාධිකරණයට අභියාචනා යොමු කර ඇතත් කොමිසමේ තීන්දුවකට එරෙහිව පනතේ 34 වගන්තිය යටතේ අභියාචකයෙකු අභියාචනාධිකරණයට අභියාචනා කළ පළමු අවස්ථාව මෙය බව කොමිෂන් සභාවේ ආරංචි මාර්ග සඳහන් කළා.
පාස්කු ප්‍රහාරය සම්බන්ධයෙන් වගකීම් පැහැර හැරියා යැයි කියන පොලිස් නිලධාරීන් පිරිසකට එරෙහිව චෝදනා පත්‍ර රාජ්‍ය සේවා කොමිෂන් සභාව විසින් එවනු ලැබූ බව මහජන ආරක්ෂක අමාත්‍යවරයාව සිටි සරත් වීරසේකර මහතා 2021 ජුනි මාසයේදී මාධ්‍ය සාකච්ඡාවකදී ප්‍රකාශ කරනු ලැබුවා. එම නිලධාරීන්ට චෝදනා පත්‍ර ලබා නොදෙන ලෙස පොලිස්පතිවරයා ලිඛිතව ඉල්ලීම් කළ බව ද පසුව වාර්තා වී තිබෙනවා.
ඒ සම්බන්ධයෙන් වන ලියවිලි ඉල්ලමින් මහජන ආරක්ෂක අමාත්‍යංශය වෙත සමාජය හා සාමයික කේන්ද්‍රයේ පර්යේෂණ කණ්ඩායම වෙනුවෙන් තරිඳු ජයවර්ධන මහතා තොරතුරු ඉල්ලීමක් යොමු කර තිබුණා. එම තොරතුරු පුද්ගලිකත්වයට සම්බන්ධ තොරතුරු හේතුවෙන් පනතේ ප්‍රතිපාදන අනුව ලබා දිය නොහැකි බව පවසමින් මහජන ආරක්ෂක අමාත්‍යංශය ප්‍රතික්ෂේප කළ බවත්, කොමිසමට අභියාචනා කිරීමෙන් පසු මෙම තොරතුරු පුද්ගලිකත්වයට අදාල නැති බවට සිය පාර්ශශවයෙන් කරුණු දැක්වූ බවත්, එම කරුණු දැක්වීමෙන් පසු මහජන ආරක්ෂක අමාත්‍යංශය සිය ස්ථාවරය වෙනස් කරමින් එම තොරතුරු තමන් සතුව නැති බව ප්‍රකාශ කළ බවත් අභියාචනාධිකරණයට ගොනු කළ අභියාචනයේ සඳහන්.
මෙම අභියාචනය තොරතුරු කොමිසමට යොමු කළේ මහජන ආරක්ෂක අමාත්‍යංශය තොරතුරු ලබාදීම ප්‍රතික්ෂේප කිරීම සම්බන්ධයෙන් බවත්, පෞද්ගලික තොරතුරු බව කියමින් තොරතුරු ලබාදීම ප්‍රතික්ෂේප කිරීම සම්බන්ධයෙන් සලකා බැලීමට තොරතුරු කොමිසම අසමත්වී ඇති බවත්, මෙම අභියාචනයේදී මහජන ආරක්ෂක අමාත්‍යංශය මෙම තොරතුරු තමන් සතුව නැතැයි කියමින් ව්‍යාජ තොරතුරු ඉදිරිපත් කිරීම ගැන පරීක්ෂණයක් පවත්වන්නැයි කළ ඉල්ලීම ද තොරතුරු කොමිසම සලකා බලා නැති බවත් අභියාචනයේ දැක්වෙනවා.
තොරතුරු දැන ගැනීමේ අයිතිවාසිකම පිළිබඳ පනත යටතේ නිකුත් කළ රීති අනුව කොමිසමට පරීක්ෂණයක් කිරීමට හැකියාව ඇත්තේ අභියාචනයක් අතරතුරදී බව ද, මහජන ආරක්ෂක අමාත්‍යංශය ව්‍යාජ තොරතුරු ඉදිරිපත් කරන බව සනාථ කිරීමට ලිපි අංක කිහිපයක් අභියාචක විසින් තම ලිඛිත දේශනයේදී සඳහන් කර ඇතත් කොමිසම සිය තීන්දුව ලබා දෙද්දී ඒ ගැන පරීක්ෂණයක් කර නැති බව ද ඒ අනුව කොමිසම ලබා දුන් තීන්දුව වැරදි බව ද අභියාචනයේ වැඩිදුරටත් සඳහන් වනවා.
මාධ්‍යවේදී තරිදු ජයවර්ධන මෙම අභියාචනය මගින් අභියාචනාධිකරණයෙන් ඉල්ලා ඇත්තේ තොරතුරු කොමිසම මෙම අභියාචනය සම්බන්ධයෙන් ලබා දී ඇති තීන්දුව අහෝසි කරන ලෙසයි.
මහජන ආරක්ෂක අමාත්‍යංශය තොරතුරු පනතේ 39 වැනි වගන්තිය යටතේ වරදක් සිදු කිරීම සම්බන්ධයෙන් 2017 තොරතුරු දැන ගැනීමේ රීතිවල 26 වැනි රීතිය යටතේ පරීක්ෂණයක් කිරීමට කොමිසමට නියෝග කරන ලෙසත්, ඉල්ලා ඇති තොරතුරු මුදා හැරීමට තීන්දු කරන ලෙසත් වැඩිදුරටත් මෙම අභියාචනය මගින් ඉල්ලා තිබෙනවා.
නීතිඥ මනුෂිකා කුරේ මහත්මිය සමග නීතිඥ සුරේන් ඩී පෙරේරා මහතා අභියාචක වෙනුවෙන් පෙනී සිටි අතර වැඩිදුර කැඳවීම පෙබරවාරි 13 වැනිදාට කල් තැබුණා.