ගුවන් යානයකින් මගියෙක් බිමට පැනීමේ සිද්ධියක් පිළිබඳව තොරතුරු වාර්තා වෙනවා.
ඒ කැනඩාවේ ටොරොන්ටෝ පියර්සන් ජාත්‍යන්තර ගුවන්තොටුපළෙන්.
පියර්සන් ජාත්‍යන්තර ගුවන් තොටුපළේ සිට ඩුබායි බලා පිටත් වීමට සූදානම් වූ යානයක සිටි මගියෙක් මෙසේ යානයෙන් පිටතට පැන ඇති බවයි විදෙස් මාධ්‍ය වාර්තාකර සිටින්නේ.
යානයේ මගීන් ඔවුන්ගේ ආසනවල වාඩි වී සිටියත් එක් මගියෙක් පමණක් තම අසුනේ වාඩි නොවී සිටි අතර හදිසියේම ඔහු ගුවන් යානයේ දොර විවෘත කර පහළට පැන තිබෙනවා.
මෙම පුද්ගලයා අඩි 20ක් පමණ උසකින් පැන ඇති අතර පොලිසිය සහ ගලවා ගැනීමේ කණ්ඩායම් කඩිනමින් එම පුද්ගලයා බේරාගෙන රෝහල් ගත කර ඇති බවයි වාර්තා වෙන්නේ.
ඔහු ගුවන් යානයෙන් පැනීමේ හේතුව මෙතෙක් අනාවරණය වී නොමැති අතර මෙම සිදුවීමත් සමඟ යානය ඩුබායි බලා පියාසර කිරීම පැය 6කින් ප්‍රමාද වූ බවයි විදෙස් මාධ්‍ය වාර්තාකර සිටින්නේ.