ඊසාන දිග මෝසම් තත්ත්වය හේතුවෙන් ප්‍රදේශ රැසකට මිලිමීටර් 100 ඉක්මවූ වැසි ඇතිවිය හැකි බව කාලගුණවිද්‍යා දෙපාර්තමේන්තුව පවසයි.
ඌව, මධ්‍යම සහ දකුණු පළාත්වලත් මඩකලපුව, අම්පාර සහ රත්නපුර දිස්ත්‍රික්කවලත් ඉදිරි පැය කිහිපය තුළ තවදුරටත් වැසි ඇතිවිය හැකි බව එම දෙපාර්තමේන්තුව සඳහන් කළේය.
නැගෙනහිර, ඌව, බස්නාහිර, සබරගමුව සහ දකුණු පළාත්වලත් මාතලේ, පොළොන්නරුව සහ නුවරඑළිය දිස්ත්‍රික්කවලත් විටින් විට වැසි හෝ ගිගුරුම් සහිත වැසි ඇතිවිය හැකිය.
උතුරු පළාතේත් අනුරාධපුර දිස්ත්‍රික්කයේත් වැසි ස්වල්පයක් ඇතිවිය හැකි බව කාලගුණවිද්‍යා දෙපාර්තමේන්තුව පැවසුවේය.
දිවයිනේ සෙසු ප්‍රදේශවල පස්වරු 02න් පමණ පසු තැනින් තැන වැසි හෝ ගිගුරුම් සහිත වැසි ඇතිවිය හැකි බව ද එම දෙපාර්තමේන්තුව සඳහන් කළේය.
මේ අතර දැදුරු ඔය, රාජාංගනය, කලාඔය, ලුණුගම්වෙහෙර, වෙහෙරගල, ඇතුළු ජලාශවල මේ වන විට වාන්දොරටු විවෘත කර ඇති බැවින් පහළ ප්‍රදේශවල ජනතාව අවදානයෙන් පසුවිය යුතු බව වාරිමාර්ග දෙපාර්තමේන්තුව සඳහන් කළේය.
එම දෙපාර්තමේන්තුව යටතේ පාලනය වන ජලාශවල ජල මට්ටම සියයට 92ක් පමණ දක්වා වර්ධනය වී තිබේ.
මේ අතර අධික වර්ෂාව හේතුවෙන් මඩකලපුව දුම්රිය ස්ථානය ඊයේ රාත්‍රී ජලයෙන් යටවී ඇති බව වාර්තා වේ.
කෙසේවුව ද ඉන් දුම්රිය ගමනාගමනයට බාධාවක් සිදු නොවූ බව වාර්තා වේ.
මේ අතර කන්තලේ වැවේ වාන් දොරටු විවෘත කිරීම හේතුවෙන් වැවට කිලෝමීටරයක් පමණ පහළ ඇති කන්තලේ අග්බෝපුර මාර්ගයේ ගමන් කරමින් සිටි කාන්තාවන් දෙදෙනෙකු සහ පිරිමි පුද්ගලයෙකු ජල පහරට හසුව ගසාගෙන ගොස් තිබේ.
කෙසේවුවද වාන් දොරටු වසා දමා එම පිරිස බේරාගෙන ඇති බව සඳහන් වේ.
මේ අතර ලොග්ගල්ල ඔයේ ඔරුවකින් මසුන් ඇල්ලීමට ගිය පුද්ගලයින් දෙදෙනෙකුගෙන් එක් අයෙකු වතුරට වැටී අතුරුදන්ව තිබේ.
අතුරුදන්ව ඇත්තේ 25 හැවිරිදි පුද්ගලයෙකු වන අතර ඔහු සෙවීම සඳහා සෝදිසි මෙහෙයුම් ක්‍රියාත්මකයි.