ඔස්ට්‍රේලියානු සුපිරි තුන් ඉරියව් ක්‍රිකට් ක්‍රීඩක කැමරන් ග්‍රීන්ට දරුණු වකුගඩු රෝගයක් !

ඔස්ට්‍රේලියානු සුපිරි ක්‍රිකට් ක්‍රීඩක කැමරන් ග්‍රීන් හට දරුණු වකුගඩු රෝගයක් වැළදී තිබෙනවා.

එරට චැනල් 7 රූපවාහිනී නාලිකාව සමග පැවති සම්මුඛ සාකච්ඡාවකදී ඔහු මෙම රෝගී තත්ත්වය ගැන පළමු වරට ලොවට හෙළි කළා.

ග්‍රීන්ගේ මව වන බී ග්රෙසි ගර්භණීව සිටියදී 19වන සතියේදී සිදුකළ අල්ට්‍රා සවුන්ඩ් ස්කෑන් පරික්ෂාවකදී එම නිදන්ගත වකුගඩු රෝග තත්ත්වය පිළිබඳව හඳුනාගෙන තිබුණු අතර, වෛද්‍යවරු, ග්‍රීන්ගේ දෙමව්පියන්ට දැනුම්දී තිබුණේ ඔහුගේ ජීවිතය වසර 12කට පමණක් සීමා වීමට ඉඩ ඇති බවකි.

ඔහු පවසන්නේ රෝගී තත්ත්වය ගැන කණ්ඩායමේ සිය සගයින්ද නොදන්නා බවයි. චැනල් 7 සමග පැවති සම්මුඛ සාකච්ඡාවේදී ග්‍රීන් පවසා සිටියේ සිය රෝගී තත්ත්වය පිළිබඳව හෙළි කිරීමට තීරණය කළේ ඒ සම්බන්ධයෙන් ජනතාව තුළ අවබෝධයක් සහ ඒ සම්බන්ධයෙන් කළ යුතු දේ සම්ප්‍රේෂණය කිරීමට අවශ්‍ය වූ නිසා බවයි.

ඇත්තටම මට තිබෙන්නේ ටයිප් 2 කියන අවස්ථාව. වකුගඩු රෝගයක් දරුණුම වෙන්නේ ටයිප් 5 අවස්ථාවේදී. එවිට වකුගඩු බද්ධ කිරීමකට හෝ ඩයලිසිස් තත්ත්වයට යා යුතුයි. මගේ වකුගඩු ක්‍රියා කරන්නේ සියයට 60යි. නමුත් මට හැකියාව ලැබිලා තියෙනවා මගේ රෝගී තත්ත්වය කළමනාකරණය කර ගැනීමට

යනුවෙන් ග්‍රීන් වැඩිදුරටත් පවසා තිබුණා.