දෙසැම්බර් මස ශ්‍රී ලංකාවේ පැවැත්වීමට නියමිතව තිබූ පන්දුවාර 10 ක්‍රිකට් තරගාවලිය(T10) දින නියමයකින් තොරව කල් යනු ඇති බවට ශ්‍රී ලංකා ක්‍රිකට් අභ්‍යන්තර ක්‍රිකට් ආරංචි මාර්ග පවසයි.
තරගාවලිය දෙසැම්බර් මස පැවැත්වීමට නියමිතව තිබුණත් ශ්‍රී ලංකා ක්‍රිකට් සඳහා පැනවූ ජාත්‍යන්තර තහනම සහ පැනනැගුණු අනෙකුත් ගැටලු හේතුවෙන් තරගාවලිය කල් දමා ඇති බවට වාර්තා වේ.
අන්තර් සමාජ තුන්දින ක්‍රිකට් තරගාවලියේ අවසන් තරගය ලබන 8 වැනිදා පැවැත්වීමටත්, ඉන් දින කීපයක් ඇතුළත අන්තර් සමාජ පළමු පෙළ එක්දින ක්‍රිකට් තරගාවලිය පැවැත්වීමටත් කටයුතු සූදානම් කොට තිබෙන බවට ශ්‍රී ලංකා ක්‍රිකට් අභ්‍යන්තර ආරංචි මාර්ග තහවුරු කරන අතර ‘ලංකා පන්දුවාර 10’ ක්‍රිකට් තරගාවලිය කල් දමනවාද, අත හැර දමනවාද යන්න පිළිබඳව තවමත් නිසි තීරණයක් නිල වශයෙන් ප්‍රකාශ වී නැත.
ශ්‍රී ලංකා ක්‍රිකට් ජාත්‍යන්තර කාල සටහන සහ අන්තර් සමාජ කාල සටහනට අනුව පන්දුවාර 10 තරගාවලිය පැවැත්වීමට හැකි මුල්ම කාල පරාසය වන්නේ ඉන්දීය ප්‍රිමියර් ලීගය පැවැත්වෙන අප්‍රේල් මස වන අතර ඉන්දීය ප්‍රිමියර් ලීගය හා සමගාමීව ජාත්‍යන්තර ක්‍රීඩකයන් සහභාගී වන පන්දුවාර 10 තරගාවලියක් පැවැත්වීම මෙන්ම පන්දුවාර 20 ලෝක කුසලානයට මසකට පෙර මෙවන් තරගාවලියක් පැවැත්වීම අපහසු බැවින් මෙම තරගාවලිය ලබන වසරේ පළමු කාර්තු දෙක තුළ නොපැවැත්වෙනු ඇතැයි අනුමාන කළ හැක