ශ්‍රී ලංකා ක්‍රිකට් සංචිතයේ සිටින වේගපන්දු ක්‍රීඩකයින්ට මුදලට ක්‍රීඩා කරන ‘ෆ්‍රැන්චයිස්’ තරගාවලි සඳහා විදෙස්ගතවීමට අදාළව තාවකාලික තහනමක් පනවා තිබෙනවා.
ඒ ලබන ජනවාරි මාසය දක්වාය.
ශ්‍රී ලංකා ක්‍රිකට් ආයතනය මෙම පියවර ගෙන ඇත්තේ, වේගපන්දු යවන්නන් නිතර ආබාධවලට ලක්වීම හේතුවෙනි.
එසේම ශ්‍රී ලංකා වේගපන්දු යවන්නන්ට ක්‍රිකට් ආයතනය විසින් විදෙස්ගතවීමේදී ලබාදෙන විරෝධතා නොමැති බවට වන ලිපි (‘නෝ ඔබ්ජෙක්ෂන්’) නිකුත් නොකිරීමට ද තීරණය කර ඇත.
ලබන වසරේ ජනවාරි මාසයේදී සිම්බාබ්වේ කණ්ඩායම සමග එක්දින හා විස්සයි20 තරගාවලියක් ශ්‍රී ලංකාවේ පැවැත්වෙන අතර, එම තරගාවලියට සියලු වේගපන්දු යවන්නන්ගේ ශාරීරික යෝග්‍යතාව යහපත් මට්ටමක පවත්වා ගැනීම ‘ෆ්‍රැන්චයිස්’ තරගාවලි තාවකාලිකව අත්හිටුවීමට ප්‍රධානතම හේතුව වී තිබෙනවා.
විදෙස්ගතවීම අත්හිටුවීමට ශ්‍රී ලංකා ක්‍රිකට් තීරණය කිරීමත් සමඟ ලබන 28 වැනිදා ආරම්භ වීමට නියමිත අබුඩාබි ටී10 ක්‍රිකට් තරගාවලියෙන් ක්‍රිකට් ක්‍රීඩකයන් කිහිපදෙනකුම ඉවත්වී ඇතැයි වාර්තා වනවා.
ඒ අනුව ළහිරු කුමාර, ඩිල්ෂාන් මධුෂංක, වනිඳු හසං‍රග සහ මතීෂ පතිරණ යන ක්‍රීඩකයන් අදාළ තරගාවලියට සහභාගී නොවන බව වාර්තා වනවා.
කෙසේ වෙතත් චරිත් අසලංක, කුසල් මෙන්ඩිස්, කුසල් පෙරේරා, ඇන්ජලෝ මැතිව්ස්, දුනිත් වෙල්ලාලගේ, මහීෂ් තීක්ෂණ හා ලසිත් කෲස්පුල්ලේ වැනි ක්‍රීඩකයන් අබුඩාබි ටී10 ක්‍රිකට් තරගාවලියට ක්‍රීඩා කිරීමේ අපේක්ෂාවෙන් පසුවනවා.