ඉකුත් 10 වැනි දා ශ්‍රී ලංකා ක්‍රිකට් තහනම් කිරීමට ජාත්‍යන්තර ක්‍රිකට් කවුන්සිලය ගත් තීරණය අද (21) පැවති අයි සී සී විධායක මණ්ඩල රැස්වීමේදී අනුමත කර තිබෙනවා.
නමුත් එම ක්‍රිකට් තහනම පැවතිය ද ජාතික කණ්ඩායම සම්බන්ධ ක්‍රිකට් බාධාවකින් තොරව පවත්වා ගෙන යාමට ඉඩ ලැබෙන බවයි වාර්තා වන්නේ.
තව ද එළඹෙන ජනවාරියේ දී මෙරට දී පැවැත්වීමට නියමිතව තිබූ වයස අවුරුදු 19න් පහළ ලෝක කුසලාන එක්දින ක්‍රිකට් තරගාවලියේ සත්කාරකත්වය දකුණු අප්‍රිකාව වෙත ගෙන යාමට ද ජාත්‍යන්තර ක්‍රිකට් කවුන්සිලය අද තීරණය කර තිබෙනවා.
ජාත්‍යන්තර ක්‍රිකට් කවුන්සිලයේ මෙම රැස්වීමට ශ්‍රී ලංකා ක්‍රිකට් ආයතනයේ සභාපති ශම්මි සිල්වා මහතා ද සහභාගී වී ඇති බවයි වාර්තා වන්නේ.
ඉකුත් නොවැම්බර් 07 වැනි දා ශ්‍රී ලංකා ක්‍රිකට් සභාපති ශම්මි සිල්වාගේ අත්සනින් යුතුව ජාත්‍යන්තර ක්‍රිකට් කවුන්සිලය වෙත යවන ලද ලිපියෙන් ඉල්ලා සිටි කරුණු අතර එළඹෙන ජනවාරියේ මෙරට සත්කාරකත්වය යටතේ පැවැත් වීමට නියමිත වයස අවුරුදු 19න් පහළ ලෝක කුසලානය වෙනත් රටක පවත්වන ලෙස බලපෑම් කරන ලෙස ද වුණා.