වත්මන් ක්‍රිකට් පාලක මණ්ඩලය අත්හිටුවමින් ශ්‍රී ලංකා ක්‍රිකට් සඳහා සත් පුද්ගල අතුරු කමිටුවක් පත් කිරීමට ක්‍රීඩා අමාත්‍ය රොෂාන් රණසිංහ කටයුතු කර තිබෙනවා.
1973 අංක 25 දරණ ක්‍රීඩා පනත ප්‍රකාරව ක්‍රීඩා අමාත්‍යවරයා වෙත පැවරී බලතල අනුව මෙලෙස අතුරු කමිටුව පත් කිරීමටයි අමාත්‍යවරයා කටයුතු කර ඇත්තේ.
මෙම අතුරු කමිටුවේ සභාපති ලෙස, 1996 එක්දින ජාත්‍යන්තර ලෝක කුසලානය ජයග්‍රහණය සඳහා ශ්‍රී ලංකා කණ්ඩායම මෙහෙයවූ අර්ජුණ රණතුංග පත්කර ඇති අතර එහි සෙසු සාමාජිකයන් ලෙස විශ්‍රාමලත් ශ්‍රේෂ්ඨාධිකරණ විනිසුරුවරුන් වන එස්.අයි. ඉමාම්, රෝහිණී මාරසිංහ සහ අයිරාංගණී පෙරේරා යන අය පත්කර තිබෙනවා. මීට අමතරව මෙම අතුරු කමිටුවේ සාමාජිකයන් ලෙස උපාලි ධර්මදාස, රඛිත රාජපක්ෂ සහ හිෂාම් ජමාල්ඩීන් යන අය පත් කිරීමට ක්‍රීඩා අමාත්‍යවරයා කටයුතු කර තිබෙනවා.
ඒ අනුව මෙම නව අතුරු කමිටුව පත් කිරීමත් සමග ශ්‍රී ලංකා ක්‍රිකට් ආයතනයේ සභාපති ෂම්මි සිල්වාගේ සභාපතිත්වයෙන් යුත් පාලක මණ්ඩලයේ කටයුතු අත්හිටවනු ඇති.
ක්‍රීඩා අමාත්‍යවරයා විසින් පසුගිය 03වැනිදා ලිපියක් නිකුත් කරමින් සඳහන් කළේ ශ්‍රී ලංකා ක්‍රිකට් කණ්ඩායමේ ත‍රග පරාජයන්හි වගකීම් තේරීම් කමිටුව සහ ශ්‍රී ලංකා ක්‍රිකට් ආයතනය භාර ගෙන අදාල නිලධාරීන් තම ධූරයන්ගෙන් ඉල්ලා අස්විය යුතු බවටයි. එහිදී අමාත්‍යවරයා සඳහන් කර ඇත්තේ දිගින් දිගටම ලබන මෙම පරාජයන් හි වගකීම කිසිදු ක්‍රීඩකයෙකුට හට පැවරිය නොහැකි බවත්, එහි වගකීම වසර 04ක් පුරා තේරීම් කටයුතු සිදුකළ තේරීම් කමිටුවත්, අවිධිමත් ක්‍රිකට් පරිපාලනයක යෙදෙන ක්‍රිකට් විධායක කමිටුවත් භාර ගත යුතු බවයි.
ශ්‍රී ලංකා ක්‍රිකට් විධායක කමිටුවේ සහ තේරීම් කමිටුවේ හැසිරීම අනුව 2040 වර්ෂයේදී හෝ ලෝක කුසලානයක් ජයග්‍රහණය කිරීමට නොහැකි තරමේ දුර්දාන්ත තත්ත්වයෙන් සිටින බව අවධාරණය කරන අමාත්‍යවරයා, මේ මොහොතේදී ජයග්‍රහණය කළ හැකි ප්‍රබල කණ්ඩායමක් ලංකාව සතුව තිබියදී ඔවුනට අත්‍යාවශ්‍ය පහසුමක් හා තාක්ෂණය ලබා නොදී, ක්‍රීඩකයින්ගේ හා ක්‍රීඩාවේ අභිවෘද්ධිය වෙනුවෙන් ශ්‍රී ලංකා ක්‍රිකට් ආයතනයට ලැබෙන මුදල් විධායක කමිටුව විසින් තම පෞද්ගලික සුඛවිහරණය සඳහා යොදවා ගැනීම ඛේදනීය තත්ත්වයක් බවත්, සමස්ථ ක්‍රීඩාවට හා ක්‍රීඩා ලෝලීන් ගැන සිතා සුදුස්සාට සුදුසු තැන දී ක්‍රිකට් පරිපාලනයෙන් ඉවත් නොවී බහිරවයන් සේ නොසිට දැඩි ක්‍රියාමර්ග ගැනීමට පෙර තම ධූරයන්ගෙන් ඉල්ලා අස් වෙන ලෙසත් එම ලිපිය මගින් පෙර දැනුම් දෙනු ලැබුවා.
ඉකුත් නොවැම්බර් 02 වැනිදා ඉන්දියාව සහ ශ්‍රී ලංකාව අතර වන්කඩේ ක්‍රීඩාංගණයේදී පැවති 2023 එක්දින ලෝක කුසලානයේ 33වැනි තරගයෙන් ශ්‍රී ලංකාව පන්දුවාර 19යි පන්දු 04ක් අවසානයේ සියලු දෙනා දැවී ලකුණු 55ක් ක් ලබා ගනිමින් සිදුවූ අපකීර්තිමත් අන්ත පරාජයත් සමඟ ශ්‍රී ලංකා ක්‍රිකට් ආයතනයේ නිලධාරීන් සඳහා සෘජුව චෝදනා එල්ල වීමක් සිදුවූ අතර, අමාත්‍යවරයාගේ දැඩි චෝදනාවන් වලින් අනතුරුව ඊයේ උදෑසන ශ්‍රී ලංකා ක්‍රිකට් ලේකම්වරයාද සිය ධූරයෙන් ඉල්ලා අස්වීමේ ලිපිය භාරදෙනු ලැබුවා.
ආසන්නතමව ලද මෙම අන්ත පරාජයත් සමඟ පරිපාලන නිලධාරීන්ට මෙම පරාජයන්හි සහ ක්‍රීඩාවේ කඩාවැටීමේ වගකීම් භාරගෙන එම තනතුරුවලින් ඉල්ලා අස්වෙන ලෙස ඉල්ලා ශ්‍රී ලංකා ක්‍රිකට් ආයතන ඉදිරිපිට පසුගියදා සත්‍යග්‍රහයක්ද ආරම්භ කරනු ලැබූ අතර, එම සත්‍යග්‍රහය හේතුවෙන් ආයතන පරිශ්‍රය ඉදිරිපිට දැඩි පොලිස් ආරක්ෂාවක්ද යොදවා තිබෙනු දක්නට ලැබුණා. එමෙන්ම සමාජ මාධ්‍ය ජාලාවන්හි ක්‍රීඩාලෝලීන් ශ්‍රී ලංකා ක්‍රිකට් ආයතනයට සහ පරිපාලන නිලධාරීන්ට විරුද්ධව #GohomeSLCboard නමින් හෑෂ් ටැග් (Hashtags) අරගලයක්ද මේ වනවිට නිර්මාණය වී තිබෙනවා.
අමාත්‍යවරයා සහ ක්‍රිකට් විධායක කමිටුව අතර පසුගිය කාල වකවානුවේ පැවති සීතල යුද්ධය එලිපිට දෙදරා යමින් ක්‍රිකට් සභාපති ශම්මි සිල්වා ක්‍රීඩා අමාත්‍යාංශයට චෝදනා එල්ල කරමින් ජනාධිපතිවරයා වෙතට ලිපියක්ද යොමුකරනු ලැබුවා. එහිදී ශ්‍රී ලංකා ක්‍රිකට් සභාපති ශම්මි සිල්වා, ජනාධිපති රනිල් වික්‍රමසිංහ වෙත ලිපියක් යොමුකරමින් පෙන්වා දෙන්නේ ක්‍රිඩා අමාත්‍යංශයේ චේතනාන්විත බාධා කිරීම් හේතුවෙන් ශ්‍රී ලංකා ක්‍රිකට් ආයතනයේ මෙහෙයුම් කටයුතු සහ වෘත්තීය භාවය දැඩි ලෙස බලපෑමට ලක්ව ඇති බවටයි.
ඒ අනුව 2024 ජනවාරි මස දී ශ්‍රී ලංකාව සත්කාරකත්වය දැරීමට නියමිත වයස අවුරුදු 19 න් පහළ ලෝක කුසලාන ක්‍රිකට් තරඟාවලිය සම්බන්ධයෙන් රජයේ සහයෝගය ලබාගැනීමේදි ක්‍රීඩා අමාත්‍යංශයෙන් ප්‍රමාණවත් සහයෝගයක් නොලැබීම, ලංකා T10 සුපර් ලීග් තරගාවලිය සඳහා අවසර ලබාගැනීමේ දී ක්‍රීඩා අමාත්‍යංශය ප්‍රමාණවත් සම්බන්ධීකරණයක් නොදැක්වීම යන කරුණුද, මෙවර ලෝක කුසලාන තරගාවලිය, නවසීලන්තයේ ශ්‍රී ලංකා සංචාරය සහ පසුගිය වසරේ පැවති ආසියානු කුසලාන තරගාවලියටත් ශ්‍රී ලංකා ක්‍රිකට් බලධාරීන්ගේ සහභාගීත්වය ක්‍රීඩා අමාත්‍යංශය විසින් සීමා කිරීම යන චෝදනාවන්ද එම ලිපිය මගින් ඉදිරිපත් කර තිබුණා.
එහිදී ශ්‍රී ලංකා ක්‍රිකට් සභාපතිවරයා යැවූ එම ලිපියට ප්‍රතිචාර දක්වමින් ක්‍රිඩා අමාත්‍ය රොෂාන් රණසිංහද, ජනාධිපතිවරයාට යොමු කළ ලිපියක දැක්වෙන්නේ ක්‍රිකට් සභාපති ශම්මි සිල්වා ක්‍රීඩා අමාත්‍යාංශයට එල්ල කළ අදාළ චෝදනා පදනම් විරහිත හා අසත්‍ය බවයි.
ක්‍රිකට් ක්‍රීඩාවට සම්බන්ධ සියලු ක්‍රියාකාරකම් අධීක්ෂණය කරනු ලබන්නේ ක්‍රීඩා අමාත්‍යංශයේ ජාතික ක්‍රීඩා සභාව සහ ක්‍රීඩා අධ්‍යක්ෂ ජනරාල්වරයා විසින් වන අතර, තමා දන්නා තරමින් ශ්‍රී ලංකා ක්‍රිකට් ආයතනය කළ ඇතැම් ඉල්ලීම් එම බලධාරීන් විසින් අනුමත නොකළ බවද එම ලිපියේ සඳහන්.
ශ්‍රී ලංකා ක්‍රිකට්වලට කිසිදු ප්‍රතිලාභයක් අත් නොවන අන්දමින් ශ්‍රී ලංකා ක්‍රිකට් බලධාරීන් ප්‍රශ්න සහගත ලෙස කරනු ලබන අධික මූල්‍ය වියදම් ඊට හේතු වූ බවද එහි සඳහන්. පසුගිය සැප්තැම්බර් 19 වැනිදා පාර්ලිමේන්තුවේ සභාගත කළ විගණන වාර්තාවෙන්ද ක්‍රිකට් ආයතනයේ වංචා හා දූෂණ අක්‍රමිකතා තහවුරු වී ඇති බවත්, ඉදිරි නීතිමය පියවර ගැනීම සඳහා එම වාර්තා අදාළ පාර්ශ්ව වෙත යොමුකර ඇති බවත් අමාත්‍යවරයා එම ලිපියෙන් ජනාධිපතිවරයාට කරුණු පැහැදිලි කර තිබුණා.
මෙවන් පසුබිමක් තුල ශ්‍රී ලංකා ක්‍රිකට් පරිපාලනයට මහජන හා ක්‍රිකට් ලෝලීන්ගේ දැඩි විරෝධයක් එල්ල වෙමින් පවතින අතර, ඒ හමුවේ ක්‍රීඩා අමාත්‍යවරයා විසින් වත්මන් ක්‍රිකට් පාලක මණ්ඩලය අත්හිටුවමින් ශ්‍රී ලංකා ක්‍රිකට් සඳහා හත්දෙනෙකුගෙන් සමන්විත අතුරු කමිටුවක් පත් කිරීමට කටයුතු කරනු ලැබුවා.