ඊජිප්තුව, ඊශ්‍රායලය සහ එක්සත් ජනපදය දකුණු ගාසා තීරයේ සටන් විරාමයකට එකඟතාව පළකර ඇති බව විදෙස් මාධ්‍ය වාර්තා කරනවා.
මෙලෙස එකඟ වූයේ ඊජිප්තුව සිය දේශසීමාව වන ”රෆා” දේශසීමා (Rafah border) හරස් මාර්ගය නැවත විවෘත කිරීමත් සමඟ බවයි ඊජිප්තු ආරක්ෂක ආරංචි මාර්ග පෙන්වා දෙන්නේ.
අමෙරිකාවේ සහ ඊජිප්තුවේ මැදිහත් වීමෙන් එම සටන් විරාමය සඳහා හමාස් සංවිධානය සහ ඊශ්‍රායලය එකඟවූ බව රොයිටර් පුවත් සේවය වාර්තා කරනවා.
සටන් විරාමය පැය කිහිපයක් පවතිනු ඇති නමුත් නිශ්චිත කාලසීමාවක් පැහැදිලි නොමැති බව සඳහන්. ඒ අනුව එක්දින ආරම්භක නැවත විවෘත කිරීමක් ලෙස ”රෆා” විවෘතව පවතින බවට රටවල් තුන එකඟ වී ඇති බවයි වාර්තා වන්නේ.
ඊජිප්තුවේ සිනායි අර්ධද්වීපය සහ හමාස් පාලනය යටතේ පවතින ගාසා තීරය අතර මායිමේ පිහිටා ඇති රෆා, ඊජිප්තුව සහ ගාසා තීරය අතර ඇති එකම හරස් මාර්ගයයි.