කොළඹට ඊයේ (22) පස්වරුවේ ඇදහැලුනු අධික වර්ෂාවත්, සුළං තත්ත්වයත් සමග බම්බලපිටියට නුදුරු මුහුදු ප්‍රදේශයේදී ටොනේඩෝ වැනි තත්ත්වයක් ගොඩබිම දෙසට ගමන් කරන අයුරු දක්නට ලැබුණි. කාලගුණ විද්‍යා දෙපාර්තමේන්තුව පැවසුවේ, මෙය දියගොබ වලාවක් ලෙස හඳුන්වන බවය.
මුහුදු ජලය ඉහළට ඇදගැනීම මෙහිදී සිදුවන අතර ගොඩබිම සිදුවන ටොනේඩෝවට සමාන ක්‍රියාවක් එහිදී සිදුවන බව කාලගුණ විද්‍යා දෙපාර්තමේන්තුව පැවසීය.
මුහුදේ සිට ගොඩබිම දෙසට පැමිණි මෙම තත්ත්වය ගොඩබිමට පැමිණීමේදී ක්‍රමයෙන් නැතිවී යන අයුරු ද අදාළ වීඩියෝවේ දැක්වුණි.
දියගොබ වලාව ගොඩබිමට පැමිණීමත් සමග බම්බලපිටිය දුම්රිය ස්ථානයේ වහළය සුළඟට ගසාගෙන ගොස් තිබුණි.
කාලගුණ විද්‍යා දෙපාර්තමේන්තුවේ අධ්‍යක්ෂ ජනරාල් අතුල කරුණානායක මහතා,
කැටි වැහි වලාකුළක එක්තරා විශේෂ අවස්ථාවක් ලෙස මේක හඳුන්වන්න පුළුවන්. මේ වලාකුළේ තිබෙනවා උඩු සුළං සහ යටි සුළං ධාරාවක්. මේක භ්‍රමණ චලිතයක් සිද්ධ කරනවා. ඒ ආකාරයෙන් මේ පද්ධතිය ක්‍රමයෙන් ගමන් කරනවා. වලාකුළ ඇතුළ ගත්තාම අඩුපීඩන තත්ත්වයක් තමයි තියෙන්නේ. ඒ හේතුවෙන් මේ දියගොබ වලාවේ ටේල් එක ස්පර්ශ කරන හැම තැනකදීම එම පද්ධතියේ තිබෙන දේවල් ඉහළට ඇදලා ගන්නවා.