යාපනය හා කොළඹ අතර ධාවනය වන තවත් අති සුඛෝපභෝගී බස් රථයක් මීගමුව ප්‍රදේශයේදී 24 දා අළුයම ගිණිගෙන විනාශ වී ගොස් තිබේ.
මීට මාස එකහමාරකට පමණ ඉහතදීද මෙවැනිම බස් රථයක් පුත්තලම ප්‍රදේශයේදී ගිණි ගෙන සම්පූර්ණයෙන්ම විනාශ වී ගොස් තිබුණි.
මෙවර එම අති සුඛෝපභෝගී බස් රථය යාපනයේ සිට කටුනායක ගුවන් තොටුපල දක්වා මගීන් 37 දෙනෙකු රැගෙන යමින් තිබියදී එම බස් රථය හදීසියේම ගිණි ගෙන තිබේ.
බස් රථයේ සිටි මගීන් වහා බේරාගෙන ඔවුන් වෙනත් වාහනවලින් ගුවන් තොටුපළ වෙත යැවීමට බස් රථයේ රියදුරු හා කොන්දොස්තරවරයාද ජනතාවද පියවර ගෙන තිබේ.
මෙම හදිසි ගිණි ගැනීම නිසා මගීන්ට අනතුරක් සිදුව නොමැති අතර මගීන්ගේ භාණ්ඩ කීපයක් හා ගමන් මළු කීපයක් ගිණි ගෙන විනාශ වී ගොස් ඇත.
සිද්ධිය සම්බන්ධයෙන් මීගමුව පොලිසියට පැමිණිලි කිරීමෙන් පසුව මීගමුව පොලිසිය මේ සම්බන්ධයෙන් පරීක්ෂණ ආරම්භ කොට තිබේ.