2024 මහ මැතිවරණයේ ප්‍රතිඵල සියල්ල නිකුත් කර අවසන් වී තිබේ.
මැතිවරණ ප්‍රතිඵලයෙන් පෙනී යන්නේ, ශ්‍රී ලංකාවේ බහුතරයක් වූ ජනතාව ජාතික ජන බලවේගයේ වැඩපිළිවෙළ වෙත විශ්වාසය තබා ඒ කෙරේ සහාය පළ කිරීමට තීරණය කොට ඇති බවයි.
ඒ අනුව මෙවර මහ මැතිවරණ ප්‍රතිඵල හරහා ඉස්මතු වී පෙනෙන කරුණු රැසක් තිබේ.
ප්‍රභූ පැළැන්තිය ප්‍රතික්ෂේප වීම
දශක 7කට අධික කාලයක් තිස්සේ ප්‍රභූ පැළැන්තියේ දේශපාලනඥයින් රට පාලනය කිරීමේ ක්‍රමවේදය මුළුමනින් ම වෙනස් කිරීමට ජනතාවට අවශ්‍ය වූ බව ද මෙවර මහ මැතිවරණ ප්‍රතිඵලයෙන් පෙනී යයි.
2022 වසරේ ඇති වූ ආණ්ඩු විරෝධී උද්ඝෝෂණ රැල්ලේදී ප්‍රධාන සටන් පාඨයක් ද වූ ‘ප්‍රභූ දේශපාලනය අවසන් කිරීම’ ජාතික ජනබලවේග මැතිවරණ වේදිකාවේ ප්‍රමුඛ සටන් පාඨයක් ව තිබුණි. ඒ අනුව ජාතික ජනබලවේගයට බහුතර බලයක් ලබාදීමෙන් ‘ප්‍රභූ දේශපාලනය අවසන් කිරීම’ සඳහා ජනතාව තම අභිමතය ප්‍රකාශ කොට තිබේ.
හිටපු ජනාධිපති රනිල් වික්‍රමසිංහ ඇතුළුව මීට පෙර පාර්ලිමේන්තුව නියෝජනය කළ මන්ත්‍රීවරුන්, ප්‍රභූ පැළැන්තියේ දේශපාලනඥයින් සහ වියපත් දේශපාලනඥයින් රැසක් මෙවර මැතිවරණයට තරග නොකිරීමට තීරණය කොට තිබු අතර ඇතමෙක් ස්වයං විශ්‍රාම ගෙන තිබේ.
එමෙන් ම, විපක්ෂ සන්ධානය වූ සමගි ජන බලවේගය,හිටපු ආණ්ඩු පක්ෂය වූ පොදුජන පෙරමුණ සහ එයින් කැඩී ගිය සාම්ප්‍රදායික මුහුණු පෙරටු කරගත් නව ප්‍රජාතන්ත්‍රවාදී පෙරමුණ ජනතාව විසින් දරුණු ලෙස ප්‍රතික්ෂේප කර ඇති බව ද දැකිය හැකි ය.
පළපුරුද්ද රාජ්‍ය පාලනයට අවශ්‍ය බවට හිටපු ජනාධිපතිවරයා ඇතුළු හිටපු දේශපාලනඥයින් විසින් පුන පුනා දේශපාලන වේදිකාවල දී ප්‍රකාශ කළ නමුත් ජාතික ජන බලවේගයේ නවක කණ්ඩායමකට බලය ලබා දීමට බහුතර ජනතාව තීරණය කොට තිබේ.
අවුරුදු ගාණක් තිස්සේ ජනතාවගේ මනසට කාවැදිලා තිබුණා පාර්ලිමේන්තුවේ ඉන්නෙ හොරු කියලා. ජනතාව විඳින දුක්ගැහැටවලට දේශපාලනඥයින් වගකිය යුතුයි කියලා ජනතාව හිතුවා. ඒ නිසා ජනතාවට ඕන වුණා, පරණ ප්‍රභූ පැළැන්තියේ දේශපාලනඥයින් සහ ඔවුන් නියෝජනය කළ සමස්ත ක්‍රමවේදය ම බිඳ දාන්න,” පේරාදෙණිය විශ්වවිද්‍යාලයේ ආර්ථික විද්‍යා අධ්‍යයන අංශයේ මහාචාර්ය වසන්ත අතුකෝරළ පැවසීය.
ඒ අනුව, ජාතික ජන බලවේගය නියෝජනය කරමින් පාර්ලිමේන්තුවට තේරී පත්වූ විශාල පිරිසක් නවකයින් මෙන් ම තරුණ පරම්පරාව නියෝජනය කරන්නන් වනු ඇත.
ජනපති කෙරෙහි විශ්වාසය
2024 ජනාධිපතිවරණයට සාපේක්ෂව මහ මැතිවරණයේදී ජාතික ජන බලවේගයට හිමි වූ ඡන්ද සංඛ්‍යාවේ දැවැන්ත වැඩිවීමක් දක්නට ලැබේ.
ඒ අනුව, ජනාධිපතිවරණයේදී ජාතික ජන බලවේගය වෙනුවෙන් ඡන්දය භාවිත කළ ඡන්ද දායකයින් සංඛ්‍යාවට වඩා වැඩි පිරිසක් මහ මැතිවරණයේදී තම ඡන්දය ප්‍රකාශ කොට තිබේ.
ඉන් ගම්‍ය වන්නේ, ජනාධිපති අනුර කුමාර දිසානායකගේ වැඩපිළිවෙළ අගය කරන සහ විශ්වාස කරන පිරිස ඉහළ ගොස් ඇති බව ය.
පසුගිය මහ මැතිවරණයේදී ජාතික ජන බලවේගයට හිමි වූයේ, 3%ක සුළු ඡන්ද ප්‍රතිශතයකි.
ඒ අනුව, ඔවුන්ට පාර්ලිමේන්තුවේ හිමි වූ ආසන සංඛ්‍යාව 3ක් පමණි.
කෙසේ වෙතත්, මෙවර මහ මැතිවරණයෙන් ජාතික ජන බලවේගය පාර්ලිමේන්තුවේ ආසන 159ක් හිමි කර ගැනීමට සමත් වූයේ, මෙරට ප්‍රථම වරට ඉතිහාසගත ඡන්ද 6,863,186ක් ලබා ගනිමින් මැතිවරණය ජයග්‍රහණය කිරීමෙනි.
ජනතාව මෙහෙය වූ මැතිවරණ ව්‍යාපාරයක්
ජාතික ජන බලවේගයේ බිම් මට්ටමේ මැතිවරණ ප්‍රචාරක කටයුතු බොහෝවිට එම පක්ෂය විසින් නොව ජනතාව සංවිධානය වී සිදු කළ බව දක්නට ලැබිණි.
ඒ අනුව, මෙම නව රජය ජනතා රජයක් බව ශ්‍රී ලංකා මහ බැංකුවේ හිටපු නියෝජ්‍ය අධිපති ආචාර්ය ඩබ්ලිව්.ඒ. විජේවර්ධන පවසයි.
ජනතාව ස්වේච්ඡාවෙන් මැතිවරණ ප්‍රචාරණ කටයුතුවල නිරත වුණ බව අපි දැක්කා. ඒක ලොකු වෙනසක්. වෙනත් පක්ෂ මීට පෙර අනුගමනය කළ ආකාරයට මත්පැන්, බත් පැකට් වගේ දේවල් දීලා ජනතාව ගෙන්න ගන්න ජාතික ජන බලවේගයට අවශ්‍ය වුණේ නෑ. ඒක හොඳ ප්‍රවණතාවක්.
රාජපක්ෂ පවුල ප්‍රතික්ෂේප වීම
මෙවර මහ මැතිවරණයේ ප්‍රතිඵල අනුව දක්නට ලැබෙන තවත් සුවිශේෂී කරුණක් වන්නේ, රාජපක්ෂ පවුල වටා දශක කිහිපයක් පුරා පැවති බල කේන්ද්‍රය මේ වන විට බිඳ වැටී තිබීම ය.
මෙවර මහ මැතිවරණයට තරග කිරීමට ඉදිරිපත් වූ රාජපක්ෂ පවුලේ එක ම සාමාජිකයා වූයේ, ශෂින්ද්‍ර රාජපක්ෂ ය.
දෙවරක් ශ්‍රී ලංකාවේ ජනාධිපති ලෙස තේරීපත් වූ සහ පසුව පැවති මහ මැතිවරණවලින් ද විශිෂ්ට ලෙස ජය ගත් රාජපක්ෂවරුන්ගේ බළකොටු ලෙස සැලකුණු තංගල්ල, මුල්කිරිගල ආදී ආසනවල පවා ජයග්‍රහණය හිමි වූයේ, ජාතික ජන බලවේගයට ය.
උතුරු, නැගෙනහිර සැබෑ වෙනසක්
පසුගිය ජනාධිපතිවරණයේදී අනුර කුමාර දිසානායකට උතුරු නැගෙනහිර පළාත්වලින් ලැබුණේ අවම ඡන්ද සංඛ්‍යාවකි.
අනුර කුමාර දිසානායක ජනාධිපතිවරයා ලෙස දිවුරුම් දීමෙන් පසු ජාතිය අමතා කළ කතාවේදී ප්‍රකාශ කළේ, උතුරු නැගෙනහිර ඇතුළු තමන් කෙරෙහි විශ්වාසයක් නොමැති ජනතාවගේ විශ්වාසය දිනා ගැනීමට තමන් ක්‍රියා කරන බව ය.
ඒ අනුව, මෙවර මහ මැතිවරණ ඡන්ද ප්‍රතිඵලයෙන් පෙනී යන්නේ, ඔහු උතුරු නැගෙනහිර ජනතාවගේ විශ්වාසය කෙටි කලක් තුළ තහවුරු කර ගැනීමට සමත්ව ඇති බව ය.
ජනාධිපතිවරණයෙන් දින 54කට පසු පැවති මහ මැතිවරණයේදී අනුර කුමාර දිසානායක ප්‍රමුඛ ජාතික ජන බලවේගය එම පළාත්වල පළමු වරට දෙමළ ජාතිකත්වය මත පදනම් වූ දේශපාලන පක්ෂ පවා අභිබවා යමින් ජනතා කැමැත්ත හිමි කර ගැනීමට සමත්ව තිබීම විශේෂත්වයකි.
ඒ අනුව, ජනාධිපති අනුර කුමාර දිසානායක මේ මොහොතේ දී සියලු ජාතීන්ගේ විශ්වාසය දිනා ගැනීමට සමත්ව ඇති බව පෙනී යයි.
ඒ අනුව 2022 දී ඇරඹි දැවැන්ත ආණ්ඩු විරෝධතා රැල්ලකින් පසු හිටපු ජනාධිපතිවරයා සහ ආණ්ඩුව ප්‍රතික්ෂේප කළ ජනතාව දැන් ප්‍රජාතන්ත්‍රවාදී ප්‍රවේශයකින් රට සාධනීය වෙනසක් කරා මෙහෙය වීමේ භාරදුර කාර්යය සහ රටේ ඉදිරි ගමන තීරණය කිරීමේ අභියෝගය සහ වගකීම ජාතික ජන බල වේග ආණ්ඩුවේ උර මත තැබීමට තෝරාගෙන තිබේ.