බටහිර ඉන්දීය කොදෙව් එක්දින නායක ෂායි හෝප් සමගින් උණුසුම් වචන හුවමාරුවක පැටලුනු අල්සාරි ජෝසෆ්ට තරග දෙකක තහනමක් පැනවීමට කොදෙව් ක්‍රිකට් ආයතනය තීරණය කර ඇත.
එම ආයතනය පවසන්නේ අල්සාරිගේ හැසිරීම බටහිර ඉන්දීය කොදෙව් ක්‍රිකට් ආරක්ෂාකරන මූලික ආචාරධර්මයන්ට නොගැළපෙන බවයි. එනිසා එවැනි හැසිරීම් නොසලකාහැරිය නොහැකි තත්ත්වයේ වරදක් බව පවසනවා.
එංගලන්තයට එරෙහිව පෙරේදා (6) අවසන් වූ තෙවැනි හා අවසන් එක්දින තරගයේදී ඇති වූ සිදුවීමක් මුල්කරගනිමින් මෙම ක්‍රියාමාර්ගය ගෙන තිබෙනවා.
එම තරගයේ 4වැනි පන්දුවාරයේදී පන්දුවට පහරදමෙින් සිටි එංගලන්ත පිතිකරු ජෝඩන් කොක්ස්ට පිටිය සැකසූ ආකාරය සම්බන්ධයෙන් ජෝසෆ් හා නායක හෝප් අතර මෙම ආරවුල ඇතිවීමට මුල්වී ඇත.
කෙසේ නමුත් එම පන්දුවාරයේදී අල්සාරි ජෝසෆ්ට, කොක්ස්ගේ කඩුල්ල දවාගැනීමට හැකිවිය.
එහෙත් ඔහු සිය සඟයන් සමගින් කඩුලු සැමරුමට එක් නොවූ අතර, ඒ අතරවාරයේදීද වචන විවාදයකට නිතර වී තිබෙනවා.
අල්සාරිගේ එම හැසිරීමට කොදෙව් පුහුණුකරු ඩැරස් සැමී දැඩි ලෙස අප්‍රසාදය පළකළ අතර, ඒ හේතුවෙන් ඔහු පන්දුවාරය අවසන් වනවාත් සමගම අල්සාරි වහාම ක්‍රීඩාගාරයට කැඳවීමටද කටයුතු කළා.
නමුත් පසුව ඔහු නැවතත් පන්දු යැවීමේ නිතර විය.
මෙම තරගයෙන් කඩුලු 8ක පහසු ජයක් ලැබීමට බ.ඉ. කොදෙව් කණ්ඩායමට හැකි වූ අතර, ඒ සමග තරග තුනකින් යුත් තරගාවලිය තරග 2-1ක් ලෙසින් ජයගැනීමටද කොදෙව්වන් සමත් විය.