පවතින අධික පොල් මිල හමුවේ පාරිභෝගික ජනතාව මුහුණ දී තිබෙන දුෂ්කරතාවයට විසඳුමක් ලෙස පොල් වගා කිරීමේ මණ්ඩලයෙන් ජංගම අලෙවි රථ වැඩසටහනක් ඊයේ (23දා) සිට ආරම්භ කළේය.
ඒ අනුව එම ජංගම රථවලින් පොල් ගෙඩියක් රුපියල් 100ත් 120ත් අතර මිලකට පාරිභෝගිකයින්ට ලබාදෙන බව පොල් වගා කිරීමේ මණ්ඩලය පවසයි.
ඊයේ කොළඹ බල ප්‍රදේශයේ ජාතික රෝහල අසල, කිරුළපන පොදු වෙළෙඳපොළ හා මුදල් අමාත්‍යාංශ පරිශ්‍රය ආසන්නයේත් ජංගම ලොරි රථ මගින් ජනතාව වෙත පොල් අලෙවි කරනු ලැබීය. මෙම වැඩසටහන සියලු දිස්ත්‍රික්ක ආවරණය වන පරිදි ක්‍රියාත්මක කිරීමට නියමිත බව එම මණ්ඩලය පවසයි.
එසේම, ශ්‍රී ජයවර්ධනපුර කෝට්ටේ නගර සභා සීමාවට අයත් වැලිකඩ පොලිසිය ආසන්නව සහ නුගේගොඩ ආනන්ද සමරකෝන් එළිමහන් රංග පීඨය අසල ද පොල් බෙදාහැරීමේ ජංගම වැඩසටහන ක්‍රියාත්මක කෙරිණි.
එමෙන්ම, කඩුවෙල සහ බත්තරමුල්ල බල ප්‍රදේශයන් ආවරණය කරමින් සෙත්සිරිපාය රජයේ කාර්යාල පරිශ්‍රය ආසන්නයේ සහ ඩෙන්සිල් කොබ්බෑකඩුව මාවතේ පොල් වගා කිරීමේ මණ්ඩලය පිහිටි ස්ථානය අසලදී වැනි ප්‍රධාන නගරයන්හිදී ද ජනතාවට සහන ක්‍රමයකට පොල් මිලදී ගැනීමට පහසුකම් සපයා තිබිණි.
පොල් වගාකිරීමේ මණ්ඩලය දිනකට පොල් ගෙඩි දසදහසක් වෙළෙඳපොළට එක්කරයි. සඳුදා, බදාදා සහ සිකුරාදා යන දිනයන්වල පසුව ක්‍රමිකව දිනකට පොල් ගෙඩි පන්දහසක් බැගින් සතියකට පොල් ගෙඩි පහළොස් දහසක් පාරිභෝගික ඉල්ලුම අනුව වෙළෙඳපොළට යොමු කිරීමට සැලසුම් කර ඇත.
මීට අමතරව කුරුණෑගල වැවිලි සමාගම මැදිහත්ව ඊයේ දින සිට පොල් ගෙඩි 1500 බැගින් දිනපතා සැපයීමට කටයුතු සුදානම් කර තිබූ අතර, අද සිට හලාවත වැවිලි සමාගම දිනකට පොල් ගෙඩි තුන්දහස බැගින් දිනපතා ලබාදීමට එකඟ වී තිබේ.
වෙළෙඳපොළේ බොහෝ වෙළෙඳ සල් හිමියෝ පොල් ගෙඩියක් රුපියල් 180ත් 200ත් අතර ඉහළ මිලකට අලෙවි කරමින් පාරිභෝගික ජනතාව සුරාගෙන කති.