ලිංගාශ්‍රිතව බෝවන රෝගවලින් ආරක්ෂා වීමට මෙන් ම අනපේක්ෂිත ගැබ් ගැනීම් වැළැක්වීමට ‘කොන්ඩම්’ හෙවත් උපත් පාලන කොපු බහුලව භාවිතා කරනු ලබනවා.
සමාජය තුළ බොහෝදෙනා දැනුවත්ව ඇත්තේ ‘කොන්ඩම්’ හෙවත් උපත් පාලන කොපු පිරිමි පාර්ශවයේ භාවිතය සඳහා පමණක් ඇති බවයි.
නමුත් අද වන විට කාන්තාවන්ගේ සෞඛ්‍ය ආරක්ෂාව උදෙසා HIV හා ලිංගාශ්‍රිත රෝගවලින් මෙන් ම අනපේක්ෂිත ගැබ් ගැනීම් වළක්වා ගැනීම වෙනුවෙන් වූ ආරක්ෂාකාරී විකල්පයක් ලෙස කාන්තා කොන්ඩම් නිර්මාණය කර තිබෙනවා.
ශ්‍රී ලංකාව තුළ මේ පිළිබඳ දැනුවත් භාවය අවම වන නමුත් වර්තමානයේ කාන්තා කොන්ඩම් (Internal Condom | Female Condom) පිළිබඳ ලොව පුරා ප්‍රචලිත වෙමින් පවතිනවා.
කාන්තා කොන්ඩම් ද පිරිමි පුද්ගලයින් සඳහා භාවිතා කරන ඒවා මෙන් ඵලදායී වන අතර කාන්තාවන්ට යෝනි මාර්ගය තුළට ඇතුළු කර භාවිතා කිරීමේ හැකියාව පවතිනවා.
ලිංගාශ්‍රිත රෝග පිළිබඳ විශේෂඥ්‍ය වෛද්‍ය තිලානි රත්නායක පෙන්වාදෙන්නේ, ස්ත්‍රී කොන්ඩමය ලිංගික සම්බන්ධයකදී පුරුෂ ශුකාණු රඳවා ගෙන ඩිම්බ සමග සම්බන්ධ වීම අවහිර කර ගැබ් ගැනීම වළක්වන බවයි. එමෙන් ම, එකිනෙකාගේ ලිංගික ශ්‍රාවයන් ස්පර්ශ නොවන බැවින් ලිංගිකව බෝ වන රෝගවලින් ද ආරක්ෂා කරනු ලබන බවයි.
ඇය වැඩිදුරටත් සඳහන් කරන්නේ, පිරිමි කොන්ඩමයක් මෙන් කාන්තා කොන්ඩමයක් එක් ලිංගික සම්බන්ධයකට එකවරක් භාවිතා කළ හැකි බවයි.
“පිරිමි කොන්ඩමයක් වගේ කාන්තා කොන්ඩමයක් එක ලිංගික සම්බන්ධයකට එකවර යි පාවිච්චි කරන්න පුළුවන්. සමහරු නොදැනුවත්කමින් කීප දෙනෙකු සමග එක ම කාන්තා කොන්ඩමයක් පාවිච්චි කළොත් ඒ කාන්තාවට ආරක්ෂාව ලැබෙනවා, නමුත් එයා එක්ක සම්බන්ධ වෙන පිරිමි අයට රෝග බෝ විමේ අවදානමක් තියෙනවා.”
කාන්තා කොන්ඩමයක් පාවිච්චි කරනවා නම් පිරිමි කෙනා කොන්ඩමයක් පැළඳීම අවශ්‍ය වෙන්නේ නැහැ. පිරිමි කෙනත් කොන්ඩමයක් පාවිච්චි කළොත් එතකොට එතනදී කොන්ඩම් දෙක ගැලවී යාමේ හැකියාවක් තියෙනවා. අපි කියන්නේ එහෙම පාවිච්චි කරන්න එපා කියලා.
ලිංගික සම්බන්ධයකට පැයකට පමණ පෙර කාන්තා කොන්ඩමය පැළදීම හරහා එය පහසුවෙන් පළඳා භාවිත කළ හැකි බව මෙන් ම ලිංගික සම්බන්ධයට අවහිරයක් නොවීම ද එමගින් සිදුවන බව වෛද්‍යවරිය පැහැදිලි කළා ය.
“පිරිමි කොන්ඩම් එකක් පාවිච්චි කරනවා නම් ලිංගික සම්බන්ධතාවය පවත්වන වෙලාවෙදි තමයි එයා ඒක දාගන්නේ. නමුත් කාන්තා කොන්ඩම් එහෙම නෙමෙයි සම්බන්ධයට පැය කිහිපයකට කලින් වුණත් එයාට තමන්ගේ ආරක්ෂාව වෙනුවෙන් කොන්ඩමය පැලඳගෙන ඉන්න පුළුවන්.”
ලිංගික සම්බන්ධයකට පැයකට පමණ පෙර කාන්තා කොන්ඩමය පැළදීම හරහා එය පහසුවෙන් පළඳා භාවිත කළ හැකි බව මෙන් ම ලිංගික සම්බන්ධයට අවහිරයක් නොවීම ද එමගින් සිදුවන බව ද වෛද්‍යවරිය පෙන්වාදෙනවා.
“පිරිමි කොන්ඩම් එකක් පාවිච්චි කරනවා නම් ලිංගික සම්බන්ධතාවය පවත්වන වෙලාවෙදි තමයි එයා ඒක දාගන්නේ. නමුත් කාන්තා කොන්ඩම් එහෙම නෙමෙයි සම්බන්ධයට පැය කිහිපයකට කලින් වුණත් එයාට තමන්ගේ ආරක්ෂාව වෙනුවෙන් කොන්ඩමය පැලඳගෙන ඉන්න පුළුවන්.”
කාන්තා කොන්ඩම් භාවිතා කිරිමට විශේෂ පුහුණුවක් හෝ මිල දී ගැනීමට වෛද්‍ය නිර්දේශයක් අවශ්‍ය නැත. එය ඉතා පහසුවෙන් කොන්ඩමයේ සඳහන් උපදෙස් අනුගමනය කරමින් තමන්ට ම පැළදිය හැකි ය.
පිරිමි කොන්ඩම් මෙන් කාන්තා කොන්ඩම් සුලභ නැත. එමෙන් ම පිරිමි කොන්ඩම්වලට සාපේක්ෂව මිල තරමක් වැඩි අතර ඉල්ලුම අඩු වීම හේතුවෙන් මෙරට වෙළෙඳපොළේ සොයා ගැනීමේ අපහසුවක් පවතිනවා.
ශ්‍රී ලංකා ජාතික ලිංගාශ්‍රිත රෝග හා ඒඩ්ස් මර්දන වැඩසටහන් ක්‍රියාත්මක රෝහල්වලින්, ශ්‍රී ලංකා පවුල් සංවිධාන සංගමයේ මධ්‍යස්ථනවලින් සහ ප්‍රධාන පෙළේ ඔසුසල්වලින් කාන්තා කොන්ඩම් ලබා ගැනීමේ හැකියාව පවතී.
BBC සිංහල ලිපියක් ඇසුරෙන්