බස්නාහිර පළාතේ ඌරු ගොවිපොළ ආශ්‍රිතව ශීඝ්‍රයෙන් වයිරසයක් පැතිර යන බවත්, වෛරසය ආසාදනය වී මිය යන ඌරන්ගේ මස් අධි ශීතකරණවල ගබඩා කර කිලෝවක් රුපියල් 300 – 400 ත් අතර මිලකට වෙළෙඳපොළේ අලෙවි කෙරෙන බවට තොරතුරු අනාවරණය වී තිබෙනවා.
දඩුගම ප්‍රදේශයේ ඌරු ගොවිපොළවල දිනකට ඌරන් 50 දෙනකු පමණ මියයන බවත්, එම සතුන්ගේ මස් අඩු මිලට මිනිස් පාරිභෝජනය සඳහා අලෙවි කෙරෙන බවට වාර්තාවී ඇති බව ජාඇල ප්‍රාදේශීය සභාවේ ඉකුත් 02 වැනිදා පැවැති පරිසර හා පහසුකම් කමිටු සාකච්ඡාවේදීද සාකච්ඡාවට ලක්ව තිබෙන බව වාර්තා වනවා.
මූත්‍රා, කෙළ බිඳිති ආදිය හරහා මෙම වෛරසය ඌරන් අතර පැතිර යන බවත්, සතුන්ට හුස්ම ගැනීමේ අපහසුතා, පෙණහලු අකර්මන්‍ය වීම, උණ, ආහාර අරුචිය ආදී තත්ත්වයන් මෙම වයිරසය ශරීරගත වීමෙන් පසුව ඇතිවන රෝග ලක්ෂණ බවත්, ගැබිනි සතුන් ගබ්සාවීමේ හැකියාව පවතින බවත් ඔහු සඳහන් පවසනවා.
මේ සම්බන්ධයෙන් රජයේ පශු වෛද්‍ය නිලධාරීන්ගේ සංගමයේ සභාපති සිසිර පියසිරි සඳහන් කළේ, කොළඹ සහ ගම්පහ දිස්ත්‍රික්කවල ඌරු ගොවිපොළවල් ආශ්‍රිත ඌරන් අතර වෛරසයක් පැතිර යන බවයි.
මෙම වෛරසය වඩාත් පැතිර යන්නේ ඉඳුල් ආහාර ආදිය ඌරු ගොවිපොළවලට ප්‍රවාහනය කිරීම නිසා බවද ඔහු පැවසුවා.
මෙම රෝගය පාලනයට අදාළව පළාත් පාලන ආයතන විසින් අදාළ ප්‍රදේශයේ පශු වෛද්‍යවරුන් කැඳවා සාකච්ඡා කළ යුතු වූවද, මෙතෙක් එවැනි කටයුත්තක් සිදුවී නැති බවටද තොරතුරු අනාවරණය වන අතර මෙම වයිරසය සතුන්ගෙන් මිනිසුන්ට බෝවන්නේද නැතිද යන්න පරීක්ෂා කිරීමේ හැකියාව ඇත්තේ පශු වෛද්‍යවරුන්ට බවද සභාපතිවරයා වැඩිශුරටත් සඳහන් කළා.
මියගිය සතුන්ගේ මස් අඩු මිලට අලෙවි කරන බවට ලද තොරතුරු අනුව ගොවිපොළ ආශ්‍රිතව සොයා බැලුවද ඒ පිළිබඳව අනාවරණය කර ගැනීමට නොහැකිවී තිබෙන බවත්, කෙසේ නමුත් මේ වනවිට සතුන් මිය යෑම අඩුවී ඇතැයිද වැඩිදුරටත් තොරතුරු වාර්තා වනවා.