පාස්කු ප්‍රහාරයෙන් පසු සහරාන් කල්ලියට පුපුරණ ද්‍රව්‍ය ලබාදුන් පුද්ගලයින් හඳුනාගෙන ඔවුන්ගේ බලපත්‍ර තහනම් කළ නමුත් ටික කාලෙකට පසු ආරක්ෂක අමාත්‍යාංශය එම චූදිත පුද්ගලයින්ට යළිත් පුපුරණ ද්‍රව්‍ය අලෙවි කිරීමේ බලපත්‍ර ලබා දුන් බව සමස්ත ලංකා පුපුරණ ද්‍රව්‍ය අළෙවිකරුවන් ගේ සංසදය සභාපති සූර්ය කුමාර විජේරත්න ප්‍රකාශ කළා.
පාස්කු ප්‍රහාරය සිදුවීමෙන් අනතුරුව පුපරණ ද්‍රව්‍ය අළෙවිකරුවන්ට පුපුරණ ද්‍රව්‍ය නිකුත් කිරීම ආරක්ෂක අමාත්‍යාංශය මගින් නතර කළ බවත් රටේ කළුගල් ආශ්‍රිත නිෂ්පාදන කටයුතු ඇන හිටීමෙන් ගැටලු රැසක් මතුවන තත්ත්වයක් තුළ පුපුරණ ද්‍රව්‍ය ලබා ගැනීමට රුපියල් ලක්ෂ 25 ක මුදලක් පගාවක් ලෙස හිටපු රජයේ ඇමතිවරයෙකුට ලබා දෙන්නට තමන්ට සිදුවන බවත් සභාපතිවරයා පැවසුවා.
සභාපතිවරයා මේ අනාවරණය කළේ මහනුවර පේරාදෙණිය තානායමේ දී සමස්ත ලංකා පුපුරණ ද්‍රව්‍ය අළෙවිකරුවන් ගේ සංසදයේ නියෝජිතයින් විසින් කැඳවූ මාධ්‍ය සාකච්ඡාවක් අමතමිනි.
එහිදී එම සංසදයේ සභාපතිවරයා අනාවරණය කළේ පුපුරණ ද්‍රව්‍ය අළෙවි කිරීම සඳහා බලපත්‍ර නිකුත් කිරීමේ දී පසුගිය රජය සමයේ රුපියල් බිලියන ගණනක වංචා සිදුව තිබෙන බවය.
ඒ පිළිබඳව පූර්ණ විමර්ශනයක් සිදු කරන ලෙස රජයෙන් ඉල්ලා සිටින බව සමස්ත ලංකා පුපුරණ ද්‍රව්‍ය අළෙවිකරුවන් ගේ සංසදය ඉල්ලා සිටියා.
“පුපුරණ ද්‍රව්‍ය ආනයනයේ දී බෙදා හැරීමේ දී සහ සහ බලපත්‍ර නිකුත් කිරීමේදී බිලියන ගණනක වංචා සිද්ධ වෙමින් තිබුණා. ජනපතිවරණයට දින කිහිපයක් තිබිය දී හිටපු ආරක්ෂක ලේකම් කමල් ගුණරත්න මහතා පුපුරණ ද්‍රව්‍ය අළෙවි බලපත්‍ර ඔහු ගේ හා දේශපාලනඥයින් ගේ හිතවතුන්ට නිකුත් කළා. එම බලපත්‍ර වලට අදාළව මහව සහ මහනුවර ප්‍රදේශ වල මේ වනවිටත් ගබඩා ඉදිකෙරෙමින් පවතිනවා. එම ගබඩා ඉදිකිරීම සම්බන්ධ පිරිවිතරයන් ගැන ගැටලුත් තියනවා. “
“මෙම ක්ෂේත්‍රයේ පවතින වංචා,දූෂණ හා ගැටලු පිළිබඳව පුපුරණ ද්‍රව්‍ය පාලක වශයෙන් කටයුතු කරන හිටපු ආරක්ෂක ලේකම්වරයා දැනුවත් කිරීමට කාලයක් තිස්සේ උත්සහ කළත් ඔහු කිසිවෙකුට හෝ ඇහුම්කන් දුන්නේ නැහැ. මෙම ප්‍රශ්න සම්බන්ධව මාධ්‍ය හමුවේ හෝ ප්‍රකාශ කිරීමට නොහැකි වාතාවරණයක් රටේ පැවැතුණා. එම අවස්ථාවේ ආරක්ෂක ලේකම්ට හෝ රජයේ ඇමැතිවරයෙකුට චෝදනා කළා නම් අපේ බලපත්‍ර අහෝසි කරනවා. “
“වංචාව හා දූෂණය පිටු දැකීමට කටයුතු කරමින් සිටින වත්මන් ජනපතිවරයා යටතේ අපේ ගැටලු වලට සාධාරණ විසඳුමක් ලැබෙයි කියා අපි හිතනවා. “
ඔහු වැඩිදුරටත් පැවසුවේය.
සමස්ත ලංකා පුපුරණ ද්‍රව්‍ය අළෙවිකරුවන් ගේ සංසදයේ තාවකාලික ලේකම් රාජපක්ෂ සිඩ්නි ගුණතිලක අදහස් දක්වමින් පෙන්වා දුන්නේ පුපුරණ ද්‍රව්‍ය අළෙවි නියෝජිතයින් 82 නෙකු ආරක්ෂක අමාත්‍යාංශයේ ලියාපදිංචි වී සිටින බවය.
“ආර්ථික අර්බුදයත් සමඟ ඇති වූ ඩොලර් හිඟය නිසා ඇමෝනියම් නයිට්‍රේට් හිඟ වුණා. එතෙක් වෙළෙඳ අමාත්‍යාංශ්‍ය යටතේ තිබුණු රාජ්‍ය විවිධ නීතිගත සංස්ථාව මගින් පමණක් කළ ආනයන කටයුතු පෞද්ගලික අංශයටත් ලබා දීමට තීරණය කළා. “
“ඒ අනුව දේශපාලනඥයින් ගේ හිතවතුන් මෙරටට අමෝනියම් නටිට්‍රේට් ආනයනය කළා. රාජ්‍ය විවිධ නීතිගත සංස්ථාව මගින් රුපියල් 910 ට ලබාදුන් කිලෝව රුපියල් 2117 ට අළෙවි කරමින් අධික ලාභයක් ඔවුන් ලබා ගත්තා. පෞද්ගලික ව්‍යාපාරිකයින් පුපුරණ ද්‍රව්‍ය වලින් අධික ලාභ තබා ගෙන විකුණත් දී ආරක්ෂක ලේකම් හෝ කැබිනට් මණ්ඩලය හෝ කිසිදු පියවරක් ගත්තේ නැහැ. “