සමගි ජන බලවේගය පක්ෂයේ බටහිර – කොළඹ ප්‍රධාන සංවිධායක ලෙස ශ්‍රී ලංකා කාන්තා ක්‍රිකට් කැඳවුම්කාරිණියක ලෙස කටයුතු කරන අප්සාරි සිංහබාහු තිලකරත්න පත් කිරීමට පක්ෂ නායක සජිත් ප්‍රේමදාස කටයුතු කර තිබෙනවා.
අප්සාරි තිලකරත්න සමඟ ඇයගේ සැමියා වන ශ්‍රී ලංකා ක්‍රිකට් කණ්ඩායම නියෝජනය කළ හිටපු ක්‍රිකට් ක්‍රීඩක හෂාන් තිලකරත්න පසුගිය ජනාධිපතිවරණයේදී විපක්ෂ නායක සජිත් ප්‍රේමදාසට සහාය පළ කිරීම සඳහා සමගි ජන බලවේගය සමඟ එක් වුණා.
පක්ෂ ව්‍යවස්ථාවේ 6.2 වගන්තියෙන් පැවරී ඇති බලතල ප්‍රකාරව මෙම පත්කිරීම සිදුකර ඇති බවයි සමගි ජන බලවේගය සඳහන් කළේ.
ඒ අනුව පක්ෂ ව්‍යවස්ථාවේ 6.9 දක්වා වන වගන්ති මගින් මැතිවරණ බල ප්‍රදේශයේ ප්‍රධාන සංවිධායකවරිය ලෙස ඇයට පැවරී ඇති කාර්යයන් හා වගකීම් ඉටුකිරීමේ නායකත්වය හා වගකීම අප්සාරි සිංහබාහු තිලකරත්න මහත්මිය වෙත පැවරෙනු ඇති බවටද සමගි ජන බලවේගය විසින් දැනුම් දී තිබෙනවා.