දිවයිනේ නිරිත දිග කොටසේ පවතින වැසි තත්වය ඉදිරි දින කිහිපයේදී ත් තවදුරටත් බලාපොරොත්තු විය හැකි බව කාලගුණ විද්‍යා දෙපාර්තමේන්තුව පවසයි.
ඒ අනූව බස්නාහිර, සබරගමුව, වයඹ හා ඌව පළාත් වලටත්, මහනුවර, නුවරඑළිය, ගාල්ල, මාතර, අම්පාර හා මඩකලපුව දිස්ත්‍රික්ක වලටත් විටින් විට වැසි ඇති විය හැකියි.
මධ්‍යම කඳුකරයේ බටහිර බෑවුම් ප්‍රදේශ වලටත්, උතුර, උතුරු මැද සහ වයඹ පළාත් වලටත්, ත්‍රිකුණාමලය, හම්බන්තොට, මොනරාගල දිස්ත්‍රික්ක වලටත් විටින් විට පැයට කිලෝමීටර 50 දක්වා තද සුළං ඇතිවිය හැකි බවයි කාලගුණ විද්‍යා දෙපාර්තමේන්තුව පවසන්නේ.
එමෙන්ම ත්‍රිකුණාමලය සිට කන්කසන්තුරය සහ මන්නාරම හරහා පුත්තලම දක්වා සහ හම්බන්තොට සිට පොතුවිල් දක්වා වෙරළට ඔබ්බෙන් වන මුහුදු ප්‍රදේශ වල සුළඟේ වේගය පැයට කිලෝමීටර 55 දක්වා ඉහළ යා හැකි බව සඳහන්.
එම මුහුදු ප්‍රදේශ වල තද වැසි ද ඇතිවිය හැකි බවයි කාලගුණ විද්‍යා දෙපාර්තමේන්තුව පවසන්නේ.