වෙන්නප්පුව සාන්ත ජෝෂප් වාස් විද්‍යාලයේ මිලියන 100ක වටිනාකමකින් යුත් ගෘහස්ථ ක්‍රීඩාංගණය සහ ශ්‍රවණාගාරය ඉදිකිරීමේ වැඩකටයුතු අද සංචාරක, ඉඩම්, ක්‍රීඩා සහ යෞවන කටයුතු අමාත්‍ය හරීන් ප්‍රනාන්දු මහතාගේ ප්‍රධානත්වයෙන් ආරම්භ විය.
මෙහි වැඩකටයුතු ක්‍රීඩා අමාත්‍යංශයේ ක්‍රීඩා සංවර්ධන දෙපාර්ටමේන්තුවේ මූල්‍ය දායකත්වය මත සහ පාසල් ප්‍රජාව ඇතුළු සියලුදෙනාගේ දායකත්වය මත දින 90ක් තුළ අවසන් කරන බවත් මෙහිදී කිසිඳු දේශපාලනයක් නොමැති බවත් අමාත්‍ය හරීන් ප්‍රනාන්දු මහතා පැවසීය.
උත්සව සභාව අමතමින් අමාත්‍යවරයා වැඩිදුරටත් සඳහන් කළේ සාන්ත ජෝෂප් වාස් විද්‍යාලයේ සිසුන් ක්‍රීඩාංගණ පහසුකම් නොමැතිව වුව ද ඔලිම්පික් තරඟ සඳහා සහභාගීවීමට මෙන් ම 19න් පහළ ශ්‍රී ලංකා ක්‍රිකට් කණ්ඩායමට පවා තේරීමට අවස්ථාව උදාකරගෙන ඇති බවයි. ඒ අනුව සාන්ත ජෝෂප් වාස් විද්‍යාලය සඳහා පරිපූර්ණ එළිමහන් ක්‍රීඩාංගණයක් ඉදිකර දීමට කටයුතු කරන බව අමාත්‍යවරයා මෙහිදී පවසනු ලැබී ය.
