පිරමීඩාකාර ක්‍රියාකාරකම්වල යෙදෙන බවට හඳුනාගත් තවත් ආයතන සහ යෙදවුම් 8ක් පිළිබඳ ශ්‍රී ලංකා මහ බැංකුව විසින් නිවේදනයක් නිකුත් කර තිබෙනවා.
ශ්‍රී ලංකා මහ බැංකුවට ලද පැමිණිලිවලට අනුව සිදුකළ විමර්ශනවලදීයි අදාළ ආයතන සහ යෙදවුම් පිළිබඳ අනාවරණ වී ඇත්තේ.
ඒවා මහ බැංකු පනතේ (83 ඇ) වගන්තිය උල්ලංඝනය කරමින් තහනම් යෝජනා ක්‍රම ක්‍රියාත්මක කර ඇති බවට හඳුනාගෙන තිබෙනවා.
ඒ අනුව Beecoin App/Sunbird Foundation, Fast Win pvt ltd, Fruugo Oline App /Fruugo Oline pvt ltd, Genesis Business School /Era Miracle pvt ltf යන ආයතන සහ යෙදවුම් එලෙස මහ බැංකු පනතේ වගන්ති උල්ලංඝනය කරමින් පිරමිඩාකාර ව්‍යාපාර සිදුකර ඇති බව සඳහන්.
Isimaga International pvt ltd, Ledger Block, Qnet/Questnet සහ Ride to Three Freedom pvt ltd යන ආයතන සහ යෙදවුම්ද ඒ අතර වනවා.
එමෙන්ම මෙලෙස නම්කරන ලද පිරමිඩාකාර ආයතනවලට විරුද්ධව, බැංකු පනතේ (83 ඇ) වගන්තිය යටතේ අපරාධමය නඩු කටයුතු පැවරීම සළකා බලන ලෙස නීතිපතිවරයා වෙත ඉල්ලීම් යොමුකර ඇති බවද ශ්‍රී ලංකා මහබැංකුව විසින් නිකුත් කළ නිවේදනයේ වැඩිදුරටත් සඳහන්.
