තරුණියක් සමූහ දූෂණයට ලක් කළ තැපැල් සේවකයෝ සිව්දෙනෙක් පොලිස් දැලේ !

මව සමගින් තැපැල් කාර්යාලයට පැමිණි විසි හය හැවිරිදි තරුණියක් තැපැල් සේවකයෙකුගේ නිවසකට ගෙන්වා රංචු ගැසී දූෂණයට ලක් කළැයි කියන තැපැල් සේවකයින් සිව්දෙනෙකු රුවන්වැල්ල පොලිසිය විසින් පෙරේදා (29) අත්අඩංගුවට ගෙන තිබේ.

මෙලෙස අත්අඩංගුවට ගෙන ඇත්තේ රුවන්වැල්ල සහ ඉබුලාන තැපැල් කාර්යාලවල සේවය කරන තැපැල් සේවකයින් සිව්දෙනෙකි.

කන්නන්තොට ප්‍රදේශයේ පදිංචි 26 හැවිරිදි තරුණියක් පසුගිය සිකුරාදා මව සමඟින් රුවන්වැල්ල නගරයේ පිහිටි තැපැල් කාර්යාලයකට පැමිණ ඇත.

තැපැල් කාර්යාලයේදී ඔවුනට උපකාර කළ එහිම සේවකයකු වන 27 හැවිරිදි තරුණයෙකු උපකාරයක් අවශ්‍ය නම් කතා කරන්නැයි අදාළ තරුණියට දුරකථන අංකය ලබාදී ඇයගේද දුරකථන අංකය ලබාගෙන ඇත.

පසුව එම තරුණයා මෙම තරුණිය හා සුහදත්වයක් ඇති කරගනිමින්, තරුණිය කන්නන්තොට පිහිටි නිවස වෙත ගෙන්වා ගෙන දූෂණයට ලක්කර ඇත.

පසුව මොහු රුවන්වැල්ල සහ ඉබුලාන තැපැල් කාර්යාලවල සේවය කරන සිය මිතුරන් තිදෙනෙකුද නිවසට ගෙන්වාගෙන තිබේ.

අනතුරුව මොවුන් සිව්දෙනාම තරුණිය වරින් වර බලහත්කාරයෙන් දූෂණයට ලක්කර තිබෙන අතර ඇතිවූ බිය මත තරුණිය මේ බව කිසිවෙකුට හෝ පවසා නැත.

තරුණියගේ වැඩිමහල් සොහොයුරුට මේ ගැන පසුගිය 28 වැනිදා තොරතුරු අනාවරණය වී ඇත්තේ, තරුණිය දුරකථනයෙන් කතා කරමින් තැපැල් සේවකයාගේ නිවස දෙසට යන ආකාරය මිතුරෙකු දැක පැවසීමත් සමගය.

මේ අනුව වැඩිමහල් සොහොයුරා විසින් තරුණියගෙන් ප්‍රශ්න කිරීමේදී ඇය සිදුවූ සියල්ල පවසා ඇති අතර ඒ ගැන තරුණියගේ මව විසින් රුවන්වැල්ල පොලීසියට ද පැමිණිලි කර ඇත.

මේ අනුව තරුණිය වෛද්‍ය ප්‍රතිකාර සඳහා රෝහල්ගත කිරීමටත් ඇයව දූෂණයට ලක්කළැයි කියන තැපැල් සේවකයින් අත්අඩංගුවට ගැනීමටත් රුවන්වැල්ල පොලීසිය පෙරේදා කටයුතු කර ඇත.