මේ වනවිට රට තුළ සීඝ්‍රයෙන් පැතිරී යන ඉන්ෆ්ලුවෙන්සා තත්ත්වය කොවිඩ් වෛරසයේ ඔමික්‍රොන් ප්‍රභේදයේ JN.1 උප ප්‍රභේදය විය හැකි යැයි තමන් අනුමාන කරන බවත් නැවතත් කොවිඩ් වෛරසය සමාජය තුළ පැතිරෙමින් ඇති බවත් යළිත් වරක් මුහුණු ආවරණ පැළඳීමට යොමුවීම වඩාත් උචිත බවත් ජයවර්ධනපුර විශ්ව විද්‍යාලයේ ආසාත්මිකතා හා ප්‍රතිශක්ති විද්‍යාව සහ ශෛල ජෛව විද්‍යාතයේ අධ්‍යක්ෂ වෛද්‍ය මහාචාර්ය චන්දිම ජීවන්දර Twitter නමින් පෙර හැඳින් වූ X හි පණිවිඩයක් තබමින් පවසයි.
මේ වනවිට ශ්‍රී ලංකාවේ කොවිඩ් පරීක්ෂණ ශූන්‍යයට ආසන්න බැවින් අප ඉන්නා තැන සම්බන්ධව අප නොදන්නා බව පෙන්වා දෙන මහාචාර්යවරයා මේ වනවිට ඉන්දියාවේ කොචින්හි ඉන්ෆ්ලුවෙන්සා වැනි රෝග (ILI) ලක්ෂණ ඇති සියලුම රෝගීන්ගෙන් 30% ක් කොවිඩ් ආසාදිතයන් බව තහවුරු වූ බවත් පර්යේෂණ මගින් අවධාරණය වන්නේ ඔවුන් ආසාදානය කර ඇත්තේ ඔමික්‍රොන් ප්‍රභේදයේ JN.1 උප ප්‍රභේදය බවත් පෙන්වා දෙයි.
1. In India (Kochi) 30% of all patients with influenza-like illnesses (ILI) who were tested have turned out to be Covid positive in a span of about 24 hours.
— Chandima Jeewandara (@chandi2012) December 21, 2023අප දන්නා දෙය නම්, කොවිඩ් සෙම්ප්‍රතිශ්‍යාව තරම් සරල නොවන බවය. මිනිසුන්ට දැඩි ලෙස රෝගාතුර විය හැකි බවය. හෘදයාබාධ, ආඝාත සහ මානසික සෞඛ්‍ය ගැටලු ඇතිවීමේ අවදානම ඇතුළු දිගුකාලීන බලපෑම් ඇති කළ හැකි රෝගී තත්ත්වයක් බවය.
නමුත් මේ කොවිඩ් තත්ත්වය නිසා අපේ සෞඛ්‍ය පද්ධතිය අවදානමක නැත.
අපි පෙර කොවිඩ් රැල්ල සාර්ථකව කළමනාකරණය කර තිබේ. එන්නත් තවමත් ක්‍රියාත්මකය.
රෝගීන් වැඩි වුවහොත් රටේ සෞඛ්‍ය අංශ ඊට සූදානම්ය.
නමුත් ඔබ වැඩිහිටියෙක් නම්, වෙනත් රෝගාබාධ හේතුවෙන් දුර්වල ප්‍රතිශක්තියක් ඇති අයෙක් නම්, මුහුණු ආවරණ පැළඳීම සුදුසුය.
මහාචාර්යවරයා සිය ට්විටර් නමින් හැඳින් වූ X සමාජ ජාලය හරහා දන්වා සිටී. දුර්වල වාතාශ්‍රය සහිත තැනක, සංවෘත තැනක, ජනාකීර්ණ පරිසරයක ගැවසෙන පුද්ගලයින් මුහුණු ආවරණ පැළඳීම වඩා ආරක්ෂිත බව මහාචාර්යවරයා පෙන්වා දෙයි.
JN.1 හි රෝග ලක්ෂණ වන්නේ උණ, කැස්ස, සුවඳ නැතිවීම සහ රසය නැති වීම බවත්, නොනැසී පවතින අධික උණ, හුස්ම ගැනීමේ අපහසුතා, තෙහෙට්ටුව, ආහාර ගැනීමට නොහැකි වීම සහ වමනය බවත් ලෝකයේ අනෙකුත් ප්‍රදේශවල නිරීක්ෂණය කරන පරිදි මෙම ලක්ෂණ JN.1 කොවිඩ් උප ප්‍රභේදයේ අනතුරු ඇඟවීමේ සංඥා විය හැකි බවත් පවසන මහාචාර්යවරයා මෙම රෝග ලක්ෂණ වේ නම් වෛද්‍ය උපදෙස් පතන ලෙස ජනතාවට උපදෙස් දෙයි.
එන්නත් තවමත් ක්‍රියාත්මකයි !! ඔබට විශේෂයෙන් අවදානම් සහිත පුද්ගලයෙක් නම් ඔබ සඳහා බූස්ටර එන්නත අවශ්‍ය විය හැකියි. මෙය පුදුමයක් නොවේ. අතීතයේ කළාක් මෙන් කොවිඩ් ආරක්ෂණ පිළිවෙත් දිගටම පවත්වාගෙන යමු.
මහාචාර්යවරයා යෝජනා කරයි.