2024 වසර සඳහා පාර්ලිමේන්තුවට ඉදිරිපත් කිරීමට නියමිත විසර්ජන පනත් කෙටුම්පත හරහා මැතිවරණ කොමිසමට රුපියල් බිලියන 11ක මුදලක් වෙන් කිරීමට නියමිත බව සන්ඩේ ටයිම්ස් වාර්තා කරනවා.
ව්‍යවස්ථානුකූලව 2024 යනු, ජනාධිපතිවරණයක් පැවැත්විය යුතු වසර වන බැවින් ඒ ආකාරයෙන් මුදල් වෙන් කර ඇතැයි පැවසෙන්නේ.
ඉකුත් වසරේ ජුලි මාසයේ දී හිටපු ජනාධිපති ගෝඨාභය රාජපක්ෂ මහතා මහජන විරෝධතා මගින් එම ධුරයෙන් පළවා හැරීමෙන් අනතුරුව ඔහුගේ අනුප්‍රාප්තිකයා ලෙස පාර්ලිමේන්තුවේ අභ්‍යන්තර ඡන්දයකින් ජනාධිපතිවරයා ලෙස තේරී පත් වූ රනිල් වික්‍රමසිංහ මහතා දැනට එම ධුරයේ වසරකුත් මාස දෙකක කාලයක් කටයුතු කරන අතර ව්‍යවස්ථානුකූලව ඔහුගේ ධුර කාලය එළඹෙන වසරේ සැප්තැම්බර් අග වන විට අවසන් වනවා.
ඒ අනුව නව ජනාධිපතිවරයෙකු පත් කර ගැනීම අත්‍යවශ්‍ය කාරණාවක් වන බැවින්, ඊට අදාළ මැතිවරණය පැවැත්වීම සඳහා මෙලෙස මුදල් වෙන් කර ඇතැයි පැවසෙන්නේ.
මේ අතර සන්ඩේ ටයිම්ස් වෙත එක්සත් ජාතික පක්ෂයේ මහ ලේකම් පාලිත රංගේ බණ්ඩාර පවසා තිබුණේ, එළඹෙන වසරේ සැප්තැම්බර මාසයේ දී ජනාධිපතිවරයාගේ ධුර කාලය අවසන් වන බැවින් එම කාලයේ දී ජනාධිපතිවරණයක් කැඳවීමට නියමිත බවයි.
කෙසේ නමුත් නුදුරේ දී ම පාර්ලිමේන්තුවට ඉදිරිපත් කිරීමට නියමිත 2024 සඳහා වන විසර්ජන පනත කෙටුම්පතට අදාළව එම වසරේ රජයේ වියදම ලෙස රුපියල් බිලියන 3,860ක් ඇස්තමේන්තු කර ඇති අතර 2023 වසර සඳහා වූ විසර්ජන පනත් කෙටුම්පත තුළින් වෙන් කරන ලද රජයේ වියදම වූ රුපියල් බිලියන 3,657 ට වඩා රුපියල් බිලියන 203ක වැඩි වීමක්.
මේ අතර අදාළ විසර්ජන පනත හරහා වත්මන් අග්‍රාමාත්‍ය දිනේෂ් ගුණවර්ධන මහතා අමාත්‍ය ධුරය දරන රාජ්‍ය පරිපාලන, ස්වදේශ කටයුතු, පළාත් සභා සහ පළාත් පාලන අමාත්‍යාංශය වෙතට වැඩිම මුදලක් වෙන් කර ඇති අතර එම මුදල රුපියල් බිලියන 886ක් ලෙසයි සන්ඩේ ටයිම්ස් පුවත් වාර්තාව දක්වන්නේ.
ඒ අනුව එම අමාත්‍යංශයට වෙන් කර ඇති මුදල 2023 වසරට සාපේක්ෂ රුපියල් බිලියන 30ක වැඩි වීමක්. අනතුරුව අදාළ විසර්ජන පනත කෙටුම්පත හරහා වැඩි ම මුදලක් වෙන් කර ඇත්තේ ජනාධිපතිවරයා අමාත්‍ය ධුරය හොබවන මුදල්, ආර්ථික ස්ථායීකරණ සහ ජාතික ප්‍රතිපත්ති අමාත්‍යාංශය වෙත වන අතර එය මුදලින් රුපියල් බිලියන 723ක්. එම අමාත්‍යංශයේ ද වියදම් වශයෙන් 2023 වසරට අදාළව ඇස්තමේන්තු කර තිබූ රුපියල් බිලියන බිලියන 614ට සාපේක්ෂව කැපී පෙනෙන වැඩිවීමක් පෙන්නුම් කරනවා.
මේ අතර 2024 විසර්ජන පනත් කෙටුම්පත හරහා වියදම් වශයෙන් තෙවැනියට වැඩි ම මුදල් ප්‍රමාණයක් වෙන් කර ඇත්තේ ආරක්ෂක අමාත්‍යංශයට වන අතර ඒ රුපියල් බිලියන 410ක්.
තව ද ප්‍රවාහන හා මහාමාර්ග අමාත්‍යංශයට 2024 විසර්ජන පනත් කෙටුම්පත හරහා වෙන් කර තිබෙන මුදල රුපියල් බිලියන 403.6ක් බවයි සන්ඩේ ටයිම් පවසන්නේ.
මේ අතර 2024 විසර්ජන පනත් කෙටුම්පත හරහා අධ්‍යාපන අමාත්‍යාංශයට රුපියල් බිලියන 237ක්, මහජන ආරක්ෂක අමාත්‍යාංශයට රුපියල් බිලියන 140.7ක්, කෘෂිකර්ම අමාත්‍යාංශයට රුපියල් බිලියන 100ක්, වාරිමාර්ග අමාත්‍යාංශයට රුපියල් බිලියන 84ක් හා ජනාධිපති කාර්යයාලයට 2024 විසර්ජන පනත් කෙටුම්පත හරහා රුපියල් බිලියන 6.6ක් වෙන් කෙරෙනු ඇති බවයි සන්ඩේ ටයිම්ස් පවසන්නේ.