ඊයේ (08) අළුයම සරසවි නේවාසිකාගාරයේ විදුලි පංකාවක එල්ලී මිය යෑමට උත්සාහ කර ඇති සිසුවා එසේ මිය යෑමට තීරණය කර ඇත්තේ පසුගිය 07 වැනිදා නවක වදය සිද්ධියක් සම්බන්ධව ඔහුව අපරාධ පරීක්ෂණ දෙපාර්තමේන්තුවට ගෙන්වා එහි නිලධාරීන් විසින් සිදුකළ දැඩි පහර දීමෙන් පසු බව දන්වා ඔහු පොලිසියට ප්‍රකාශයක් ලබා දී තිබේ.
සිය ජංගම දුරකථනය ද සී.අයි.ඩී භාරයට ගෙන කළ පහරදීමෙන් අනතුරුව සරසවි ශිෂ්‍ය භාවය අහෝසිකර උසස් අධ්‍යාපන අවස්ථාව හමාර කරන බව තමන්ට දැන්වූ බවත් එවිට තමන්ට ජීවිතය සම්බන්ධව වෙනත් විකල්පයක් නොවූ බවත් එම සිසුවා පොලිසියට ප්‍රකාශ කර තිබේ.
මෙම ප්‍රකාශ සිසුවා විසින් පොලිසියට ලබා දී ඇත්තේ සිද්ධිය සම්බන්ධව කට උත්තර ලබා ගැනීමට පොලිස් කණ්ඩායමක් පේරාදෙණිය රෝහල වෙත පැමිණ අදාළ කටඋත්තරය සටහන් කරගන්නා අවස්ථාවේ දී ය.
මෙසේ සිය දිවි නසාගැනීමට උත්සාහ කර තිබුණේ පේරාදෙණිය විශ්වවිද්‍යාලයේ සම සෞඛ්‍ය පීඨයේ දෙවන වසර ඉගනුම ලබන මඩකලපුව ප්‍රධාන වීදියේ පදිංචි සී.විදුරාජිදන් නැමැති සිසුවෙකි.
පසුගිය වසරේ දී නවක සිසුන් වෙත අසභ්‍ය වීඩියෝපට යවමින් වට්ස්ඇප් හරහා නවක වදයට ලක් කීරීම සම්බන්ධව විශ්විද්‍යාල පාලන අධිකාරිය සිදුකළ පැමිණිල්ලකට අනුව අපරාධ පරීක්ෂණ දෙපාර්තමේන්තුව මගින් විමර්ශන ආරම්භ කර තිබිණි.