විනෝදයට දිය මත පදින යතුරුපැදි (ජෙට්ස්කී) බොල්ගොඩ ගඟේ පදිමින් සිටි මාළු ව්‍යාපාරිකයෙක් බොල්ගොඩ ගඟ හරහා ඇද තිබූ නැව් කඹයක පැටලීමෙන් ගඟට වැටී අතුරුදන්ව ඇතැයි පානදුර උතුර පොලිසිය කියයි.
සිද්ධියෙන් අතුරුදන්ව ඇත්තේ දිග්ගල ශියා මාවත පදිංචිව සිටි හෙශාන් විතානගේ නමැති 40 හැවිරිදි අවිවාහක පුද්ගලයෙකි.
අතුරුදන් වූ පුද්ගලයා සතියකට දින හතරක් පමණ ඔහුට අයත් බෝට්ටු දෙක සහ දිය මත පදින යතුරුපැදි දෙක උපයෝගී කරගෙන විනෝදයට මෝටර් බෝට්ටු සහ දිය මත යතුරු පැදි පැදීම පුරුද්දක් කරගෙන තිබූ බව පොලිස් විමර්ශනවලදී අනාවරණය වී ඇත.
අද (25) දිනත් ඔහු සුපුරුදු පරිදි විනෝදයට දිය මත යතුරු පැදි පැදවීමේදී ගොඩබිමේ සිට රස්කින් දූපත වෙත පෙරිට හරහා ගමන් කිරීම සඳහා යොදා තිබෙන නැව් කඹයේ පැටලී වැටී අතුරුදන්ව ඇතැයි පොලිසිය කියයි.
අතුරුදන් වූ ව්‍යාපාරිකයා පැදවූ ජෙට්ස්කී යතුරු පැදිය ගං ඉවුරේ තිබී පොලිසිය මඟින් සොයාගෙන ඇත.
ව්‍යාපාරිකයාගේ සිරුර සෙවීම සදහා සඳහා පොලිස් එක් කොට්ඨාසයේ නිලධාරීන් සහ ප්‍රදේශවාසීන් කටයුතු කරනු ඇතැයි පොලිසිය කියයි.
පානදුර උතුර පොලිසිය පරීක්ෂණ පවත්වයි.
