ලොවක් කම්පා කරමින් ඉන්දියාවේ නැගෙනහිර ඔඩීෂා ප්‍රාන්තයේ සිදුවූ ඛේදනීය දුම්රිය අනතුර පිළිබඳව ජනාධිපති රනිල් වික්‍රමසිංහ මහතා ශෝකය ප්‍රකාශ කර තිබෙනවා.
අනතුර සැලවීමෙන් තමන් මහත් කම්පනයට පත් වූ බවයි ජනපති රනිල් වික්‍රමසිංහ මහතා ඉන්දීය අග්‍රාමාත්‍ය නරේන්ද්‍ර මෝදි වෙත විශේෂ පණිවිඩයක් යොමුකරමින් දැනුම් දී ඇත්තේ.
මෙම අසීරු අවස්ථාවේ ශ්‍රී ලංකා රජය සහ රටවාසි ජනතාව සිය අසල්වාසී රාජ්‍ය වූ ඉන්දියාව සහ එහි සහෝදර ජනතාව සමඟ අත්වැල් බැඳගෙන සිටින බවයි ජනපතිවරයා වැඩිදුරටත් සඳහන් කරන්නේ.
අනතුරින් මියගිය සියලුදෙනාගේ පවුල්වල සාමාජිකයන් වෙත සිය බලවත් ශෝකය පළ කළ ජනාධිපති රනිල් වික්‍රමසිංහ මහතා තුවාල ලැබූවන් වෙත ඉක්මන් සුවය ද ප්‍රාර්ථනා කර සිටියා.
එමෙන්ම අපේක්ෂා නොකළ අන්දමේ මෙම සිදුවීමට මුහුණදීමට ඉන්දීය රජයට ශක්තිය, ධෛර්යය ප්‍රාර්ථනා කරන බවයි ජනාධිපතිවරයා සිය පණිවිඩයේ සඳහන් කරන්නේ.