වැලිගම දෙනිපිටිය ප්‍රදේශයේ සිදුවූ වෙඩිතැබීමකින් පුද්ගලයෙකු මියගොස් තිබේ.
පොලීසිය ප්‍රකාශ කළේ ඊයේ (15) රාත්‍රී 9.40ට පමණ දෙනිපිටිය මුල්ලබොක්ක මාර්ගයට හැරෙන මංසන්ධිය අසලදී යතුරුපැදියකින් පැමිණි නාඳුනන පුද්ගලයින් දෙදෙනෙකු විසින් ස්කූටි වර්ගයේ යතුරුපැදියෙන් ගමන් කරමින් සිටි පුද්ගලයින් දෙදෙනෙකුට මෙම වෙඩි තැබීම සිදුකර පළාගොස් ඇති බවයි.
වෙඩිවැදීමෙන් 52 හැවිරිදි පැලෑන ප්‍රදේශයේ පදිංචිව සිටි කමල් චමින්ද නැමති පුද්ගලයෙකු මියගොස් ඇති අතර ඔහුගේ 20 හැවිරිදි පුත්‍රයා වෙඩි වැදී ප්‍රතිකාර සඳහා මාතර රෝහලට ඇතුළත් කර ඇත.
වෙඩික්කරුවන් විසින් වෙඩිතැබීම සිදුකරන අවස්ථාවේ පුතා එම ස්ථානයෙන් පළා ගොස් ඇති අතර ඔහුව ලුහුබැඳ ගොස් වෙඩිතැබීම සිදුකර තිබේ. එහිදී ඔහුගේ පපුවට හා අතට වෙඩිවැදී තුවාල ලබා ඇත.
වෙඩික්කරුවන් සොයා විශේෂ කාර්ය බළකාය, වැලිගම පොලීසිය සහ අවට පොලිස් ස්ථාන කිහිපයක නිලධාරීන් පරීක්ෂණ ආරම්භ කර ඇත.