සමගි ජන බලවේගය මැති ඇමති තනතුරු බෙදා ගැනීම් වැනි වරදාන වරප්‍රසාද මුල් කරගනිමින් ආණ්ඩුව සමග එක්වීමට සූදානම් වන බවට සාවද්‍ය ප්‍රවෘත්තියක් ආණ්ඩුවට හිතැති කණ්ඩායම් විසින් නිර්මාණය කොට සමාජගත කර තිබෙන බව විපක්ෂ නායක සජිත් ප්‍රේමදාස විසින් අද (16) නිවේදනයක් නිකුත් කරමින් සඳහන් කරනවා.
ඔහු සඳහන් කරන්නේ එම ව්‍යාජ ප්‍රවෘත්තිය සහමුලින්ම තමන් ප්‍රතික්ෂේප කරන බවත් අදාළ සිද්ධිය පිළිකුලෙන් යුතුව එය හෙළා දකින බවත් ය.
සෙවනැලි ආණ්ඩුවක් බවට පත්වෙමින් සිටින ආණ්ඩුව මුල සිටම සිදු කරමින් සිටියේ සමගි ජන බලවේගය පිළිබඳව ව්‍යාජ පුවත් ජනගත කරමින් සිය අසාර්ථක බලන්‍යාය පත්‍රය ක්‍රියාත්මක කිරීමට උත්සාහ කිරීම බවත්, එම නිසා ධනවාදී කල්ලිවලත්, ප්‍රතිගාමී බලවේගවලත් එකම අභියෝගය සමගි ජන බලවේගයට හානි කිරීම වෙනුවෙන් ඕනෑම මිලක් ගෙවීම බවත් ඔහු සඳහන් කරනවා.
සමගි ජන බලවේගයෙන් කණ්ඩායමක් ආණ්ඩුවට එක්වන බවට මුලින් ව්‍යාජ ප්‍රවෘත්ති පළ කළ ඒ කල්ලිය සිය නවතම උපාය මාර්ගය ලෙස භාවිතා කරන්නේ අගමැති මැති ඇමති තනතුරු වෙනුවෙන් සමගි ජන බලවේගය ආණ්ඩුව හා එක්වන බවට වන ව්‍යාජ පුවත බවත් විපක්ෂ නායක වරයා පවසනවා.
මැතිවරණයකින් තොරව මෙම අභාග්‍ය සම්පන්න ඉරණමෙන් රට මුදවා ගත නොහැකි බවද එම නිවේදනයේ වැඩිදුරටත් සඳහන්.
2023.04.17