රත්ගම ප්‍රදේශයේ පාසලක ඉගෙනුම ලබන 16 හැවිරිදි වියේ පසුවන පාසල් සිසුවියකට හාදුවක් දුන් එම පාසලේම ගුරුවරයෙකු අත්අඩංගුවට ගත් බැව් රත්ගම පොලිසිය පවසයි .
අත්අඩංගුවට ගෙන ඇත්තේ තිස් පස් හැවිරිදි වියේ පසුවන එම පාසලේ තාක්ෂණික විෂය උගන්වන ගුරුවරයෙකි
එක්දරු පියකු ද වන මෙම ගුරුවරයා මෙම පාසල් සිසුවිය පාසලේ පඩිපෙළ මතදී අතින් ඇද බදාගෙන හාදුවක් ලබා දී ඇති බැව් පොලිසිය පවසයි. මෙම පාසල් දැරිය පාසලේ ක්‍රීඩාංගනය තුළ සිටියදී පාසල් ගුරුවරයා විසින් ඇයට පන්ති කාමරයට ගොස් කවකටුව රැගෙන එන ලෙස පවසා ඇත.
පසුව මෙම ගුරුවරයාද පාසල් සිසුවියගේ පිටුපසින් ගොස් ඇත. ඇය පන්ති කාමරයට ගොස් කවකටුව රැගෙන පඩි පෙළ මතින් බැස යමින් සිටියදී ගුරුවරයා විසින් ඇයගේ අතින් ඇද හාදුවක් දී ඇති බැව් විමර්ශනවලදී අනාවරණය වී ඇත. පාසල් දැරිය මෙම පාසලේ 11 වසරේ ඉගෙනුම ලබන දැරියකි. ඇය මේ පිළිබඳ තම මිතුරියන්ට පැවසීමෙන් පසු පන්ති භාර ගුරුතුමිය විසින් විදුහල්පතිවරයාට දැනුම් දී ඇත.
මෙම සිද්ධිය පාසලේ සිසුන්ටද ආරංචි වී ඇති අතර ඔවුන් මෙම ගුරුවරයාට පහර දීමට උත්සාහ කොට ඇත. මේ නිසා ගුරුවරයා පාසලේ කාමරයක් තුළ දමා වසා ඇත.
මේ පිළිබඳව පොලීසියට දැනුම් දීමෙන් පසු පොලිස් නිලධාරීන් පාසලට ගොස් පාසල් දැරියකට ලිංගික අතවර කිරීම සම්බන්ධයෙන් ගුරුවරයා අත්අඩංගුවට ගෙන ඇත