බැසිල්ගෙන් ජනපතිට තර්ජන !

ජනාධිපති රනිල් වික්‍රමසිංහ මහතා සහ බැසිල් රාජපක්ෂ මහතා අතර පෞද්ගලික මට්ටමේ සාකච්ඡාවක් සිදුව ඇති බව දේශපාලන ආරංචි මාර්ග පවසනවා.

ඒ අනුව එහිදී පළාත් පාලන ඡන්ද විමසීම සහ කැබිනට් අමාත්‍යවරුන් පත් කිරීම සම්බන්ධයෙන් ප්‍රධාන ලෙස කරුණු සාකච්ඡා වී ඇති අතර බැසිල් රාජපක්ෂ ජනාධිපතිවරයා හමුවේ යම් අමනාපයකින් කරුණු දක්වා ඇති බවටද වාර්තා වනවා.

එහිදී බැසිල් රාජපක්ෂ ජනාධිපතිවරයාට දැනුම් දී ඇත්තේ ඔබතුමා ජනාධිපති කිරීමට සහය ලබාදීමේදී ඇති කරගත් පොරොන්දු ඉටු කිරීමට අපොසහත් වී ඇති බවත් ජොන්ස්ටන් ප්‍රනාන්දු, රෝහිත අබේගුණවර්ධන, මහින්දානන්ද අලුත්ගමගේ, පවිත්‍රා වන්නිආරච්චි, එස්.එම්. චන්ද්‍රසේන ඇතුළු පොහොට්ටු මන්ත්‍රීවරුන්ට මෙතෙක් කැබිනට් අමාත්‍ය ධුර ලබා නොදීම පිළිබඳ බැසිල් රාජපක්ෂ දැඩි කනස්සල්ලකින් යුතුව මෙහිදී අදහස් දක්වා ඇති බවද දේශපාලන ආරංචි මාර්ග පවසනවා.

එහිදී අදහස් දැක්වූ බැසිල් රාජපක්ෂ ජනාධිපතිවරයා වෙත ප්‍රකාශ කර ඇත්තේ ” මට මේ ඡන්දේ තිබ්බත් එකයි නැතත් එකයි , ආණ්ඩුව දිනුවත් එකයි පැරදුණත් එකයි. හැබැයි ආණ්ඩුව ශක්තිමත් කරන්න ඕන නම් අපි ඉදිරිපත් කරපු යෝජනා ක්‍රියාත්මක කරන්න” ලෙසයි.

කෙසේ නමුත් එකවර මන්ත්‍රීවරුන් 10 දෙනෙක්ට කැබිනට් අමාත්‍ය ධුරවල දිවුරුම් දුන් හොත් එය රට තුළ විශාල විරෝධයක් මතුවීමට ඉඩ ඇති බැවින් කඩින් කඩ ඇමතිකම් ලබාදීමට සුදානම් බවට බැසිල් රාජපක්ෂ පාර්ශවයට දැනුම්දීමට ජනාධිපතිවරයා කටයුතු කර ඇති බවද සඳහන්.

ඒ අනුව ජනාධිපතිවරයා මෙහිදී තීරණය කර ඇත්තේ, ඉතිරිව ඇති කැබිනට් ඇමැති ධුර 12න් පොදුජන පෙරමුණට 7ක් ද ඉතිරි කැබිනට් අමාත්‍ය ධුර 5 ජනාධිපතිවරයාට හිතවත් මන්ත්‍රීවරුන්ට ලබාදීමට වන අතර පසුගිය සතියේ පවිත්‍රා වන්නිආරච්චිට නව අමාත්‍ය ධූරක්ද හිමි වුණා.