හෝමාගම දියගම පිහිටි සරසවියේ තාක්ෂණ පීඨයේ ඉගෙනුම ලබන සිසුවෙකු නේවාසිකාගාරය තුළ දී ය අභිරහස් ලෙස මිය ගොස් ඇතැයි කහතුඩුව පොලිසිය පවසයි.
මෙසේ මියගොස් ඇත්තේ පොතුහැර කටුපොත “නන්දන ගෙදර” පදිංචි නවුම්පලගේ මලිත් යශෝධ (25) හැවිරිදි දෙවන වසරේ ඉගෙනුම ලබන සිසුවෙකු බව පොලිසිය කියයි .
මෙම සිසුවා නිවාඩු ලබා නිවසට ගොස් සිට ඉකුත් 01 දා නැවත සරසවියට පැමිණ ඇති අතර ඔහු සමඟ නේවාසිකාගාරයේ කාමරය තුළ සිටින අනෙක් මිතුරා නිවාඩු ලබා පැමිණ නොසිටීම හේතුවෙන් මොහු පමණක් කාමරයේ සිට ඇතැයි පැවසේ .
ඒ අනුව 02 දා දහවල් වනතෙක් මොහු කාමරයෙන් පිටතට නොපැමිණීම නිසා වෙනත් මිතුරෙකු ඔහු නිදා සිටින කාමරය අසලට ගොස් බැලීමේදී ඒ තුළ ඔහු නිදා සිටිනු දැක ඇතැයි පැවසේ.
පසුව එම මිතුරා කාමරය තුලට ගොස් අවදි වන ලෙස මොහුට කතා කළ ද ඊට ප්‍රතිචාර නොදැක්වීම නිසා මිතුරා ඔහු අසලට ගොස් සිරුරට අත තබා නැගිට්ට වීමට සූදානම් වීමේ දී ඔහුගේ සිරුර සීතල බවකින් යුක්ත වීම නිසා, සැක සිතී ඒ බව පාලනාධිකාරිය දැනුවත් කොට ක්ෂණයකින් ප්‍රතිකාර සදහා හෝමාගම මූලික රෝහලට ඇතුළත් කොට ඇතැයි පැවසේ.
එහිදී මෙම සිසුවා පරීක්ෂා කළ වෛද්‍යවරුන් පවසා ඇත්තේ ඔහු මියගොස් ඇති බවයි.
මරණයට හේතුව මෙතෙක් අනාවරණය වී නොමැති අතර එය අනාවරණය කර ගැනීම සඳහා මෘත දේහය පිළිබඳ පශ්චාත් මරණ පරීක්ෂණය හෝමාගම හදිසි මරණ පරීක්ෂක සාම විනිසුරු චිත්තක උදය කුමාර මහතා විසින් සිදු කිරීමට නියමිතය.
සිද්ධිය සම්බන්ධයෙන් කහතුඩුව පොලිසිය පරීක්ෂණ පවත්වති.