අප්‍රිකානු සූකර උණ ආසාධිත හෝ අවධානම් ප්‍රදේශ ලෙස ශ්‍රී ලංකාවේ සියලූම ප්‍රාදේශීය ලේකම් කොට්ඨාසයක් ම නම් කරමින් අති විශේෂ ගැසට් නිවේදනයක් නිකුත් කර තිබෙනවා.
සත්ත්ව නිෂ්පාදන හා සෞඛ්‍ය අධ්‍යක්ෂක ජෙනරාල් චන්ද්‍රිකා හේමාලි අබේරත්න විසින් නිකුත් කර ඇති මෙම ගැසට් නිවේදනයට අනූව පසුගිය 25 දින සිට මාස තුනක කාලයක් දක්වා මෙම වකවානුව අවධානම් කලාපයක් ලෙස ගැසට් නිවේදනයේ සඳහන්.
අදාළ ගැසට් පත්‍රයට අනූව රෝගයේ අවධානම් ප්‍රදේශ සීමා කිරීමට සහ පැතිර යාමේ ඉඩකඩ අවම කිරීමට පහත සඳහන් ක්‍රියාවන් තහනම් කර තිබෙනවා.
- සියලුම අවධානම් සහිත ඌරන්, ඌරු මස් සහ එම නිෂ්පාදන හෝ රෝගකාරක ද්‍රව්‍ය ආසාදිත හෝ අවධානම් ප්‍රදේශය තුල හෝ ප්‍රදේශයෙන් පිටතට ප්‍රවාහනය කිරීම, ඉවත් කිරීම, රැගෙන යාම හෝ පලවා හැරීම.
- ආසාධිත සතුන් ඝාතනය කිරීම.
- රෝග අවධානමට ලක්ව සිටින සතුන් සඳහා කෘතිම අභිජනන ක්‍රම භාවිතා කිරීම.
- අවධානම් සතුන් භාවිතා කරමින් සජීවී සත්ත්ව වෙළඳපොළ පැවැත්වීම, දර්ශණය හා තරඟ පැවැත්වීම.
- ඌරන්, ඌරු මස් සහ එම නිෂ්පාදන, රෝගකාරක ද්‍රව්‍ය විකිණීම, විකිණීමට පාත්‍ර කිරීම, ගබඩා කිරීම හෝ බෙදාහැරීම හා ඌරුමස් වලින් නිෂ්පාදන සැකසීම.
- අදාළ රෝගයට පාත්‍ර වූවා යැයි සැක කරන ඕනෑම සතෙකුගේ මළකුණක් හෝ එහි කොටසක් හෝ වෙනත් කිසියම් කොටසක් අවදානමට ලක් වූ ද්‍රව්‍යක් හෝ ජලය සම්බන්ධ කිසිඳු ස්ථානයකට දැමීම.
- අදාළ රෝග හේතුවෙන් මරුමුවට පත්වන්නා වූ හෝ ආසාධිත වූවා යැයි සැකයට හේතු වූ යම් සතෙකුගේ මළකුණක් හෝ එහි කොටසක් වෙනත් සතුන් විසින් විසින් වෙනත් ස්ථානයකට හෝ ප්‍රදේශයකට රැගෙන යාමට හැකි පරිදි තැන් තැන් වල දැමීම, ස්ථානගත කිරීම තහනම් වේ.