පසුගියදා කොළඹ නෙළුම් කුළුණේදී මියගිය දැරියගේ සිද්ධිය සම්බන්ධයෙන් එම දැරියගේ දෙමාපියන් ප්‍රකාශයක් සිදු කර තිබෙනවා. එහිදී ඔවුන් සඳහන් කර තිබුනේ තම දියණිය පිළිබඳ ජනමාධ්‍ය මගින් අසත්‍ය තොරතුරු ප්‍රචාරය කිරීම සම්බන්ධයෙන් දැඩි කණස්සල්ල පළකරන බවයි.
දැරියගේ මාපියන් පවසන්නේ, බාලවයස්කාර දැරියකගේ නම, ඇයගේ තොරතුරු සහ ඇයගේ පවුලේ අය සම්බන්ධ වෙනත් පෞද්ගලික තොරතුරු ප්‍රසිද්ධ කිරීම ඇතුළුව, ජනමාධ්‍ය ආයතන කිහිපයක් විසින් ජනමාධ්‍ය ආචාරධර්ම උල්ලංඝනය කර ඇති බවයි.
තවද, මාස කිහිපයකට පෙර කොළඹ අල්ටෙයාර් මහල් නිවාස සංකීර්ණයේදී සිදුවූ මිතුරන්ගේ මරණය සම්බන්ධයෙන්, තම දියණිය තම පාසලේ සිසුන්ගේ මාපියන් සහ ගුරුවරුන් යන දෙපාර්ශ්වයේම හිරිහැරවලට ගොදුරු වී ඇති බවද ඔවුන් සඳහන් කරති.
එම දරුවන් දෙදෙනාගේ අනතුර සම්බන්ධයෙන් තම දියණිය තොරතුරු දැන, ඒවා සඟවාගෙන සිටි බවට ඇතැමුන් චෝදනා කළ බවද, එම තත්වය හේතුවෙන් සිය දියණිය දැඩි පීඩාවට පත්ව සිටි බවද ඔවුහු පවසනවා.