පළාත් පාලන මැතිවරණය සඳහා නාම යෝජනා භාරදුන් ඇතැම් අපේක්ෂකයන් මේ වන විට වෙනත් පක්ෂ නියෝජනය කළද, මැතිවරණ ප්‍රතිඵලයෙන් පසු ජයග්‍රහණය කළත් ඔවුන් ඉවත් කිරීමේ බලය පක්ෂ ලේකම්වරුන් සතු වන බව මැතිවරණ කොමසාරිස් ජනරාල් සමන් ශ්‍රී රත්නායක මහතා පවසනවා.
ඒ අනුව එම මැතිවරණය ලංකාවේ දේශපාලකයන්ගේ සළුපිළි ගැලවෙන මැතිවරණයක් වනු ඇති බවයි ඒ මහතා ප්‍රකාශ කර සිටියේ.
පසුගිය වසරේ මාර්තු 08 වැනිදා පළාත් පාලන මැතිවරණය පැවැත්වීමට නියමිතව තිබුණද අවස්ථා 03කදී එය කල්දැමුණා.
ඉන්පසු ඉදිරිපත් වූ මූලික අයිතිවාසිකම් පෙත්සම් සළකාබැලීමෙන් පසු ශ්‍රේෂ්ඨාධිකරණය මගින් මැතිවරණ කොමිසමට නියෝග කළේ කඩිනමින් මැතිවරණය පැවැත්වීමට කටයුතු කරන ලෙසයි.
මැතිවරණ කොමිසාරිස් ජනරාල්වරයා පෙන්වා දෙන්නේ මේ අධිකරණ නියෝගය හේතුවෙන් කැඳවන ලද නාම යෝජනා පත්‍ර අනුව ඒවාගේ කිසිඳු වෙනසකින් තොරව පළාත් පාලන මැතිවරණය පැවැත්විය යුතුව ඇති බවයි.
ඒ අනුව නාම යෝජනා කැඳවීමෙන් පසු ඇති වූ දේශපාලන තත්ත්වයන් මත පක්ෂ මාරු කළ අපේක්ෂකයන් පිළිබඳව මැතිවරණ කොමිසමට කිසිදු වගකීමක් ගත නොහැකි බවයි සමන් ශ්‍රී රත්නායක මහතා පෙන්වා දුන්නේ.
ඒ හේතුවෙන් මෙම මැතිවරණය ලංකාවේ ප්‍රතිපත්ති ගරුක දේශපාලනය පිළිබඳ හරස්කඩක් වනු ඇති බව සඳහන් කළ කොමසාරිස් ජනරාල්වරයා, එය ජනතාවට තමන්ගේ ඡන්ද බලය පිළිබඳ නැවත සිතා බැලීමට අවස්ථාවක් ලබාදෙන්නේ යැයි ද ප්‍රකාශ කළා.
පළාත් පාලන ආයතන සඳහා නාම යෝජනා ලබා දුන් අපේක්ෂකයන් අතරින් අති බහුතරයක් මේ වනවිට වෙනත් පක්ෂවල හා සන්ධානවලට එක්ව තිබෙනවා.
එබැවින් ඔවුන්ට තමන් නාමයෝජනා දුන් පක්ෂය සමග ජනතාව ඉදිරියට යාමට නොහැකි තත්ත්වයක් පවතිනු ඇති.
එමෙන්ම යම් හෙයකින් ඔවුන් මැතිවරණය ජයග්‍රහණය කළත් එම මන්ත්‍රීධූරය පිළිබඳ අවසන් තීරණය පවතින්නේ පක්ෂ ලේකම්වරයා සතුවයි.