2024 පාර්ලිමේන්තු මැතිවරණයට ජාතික නිදහස් පෙරමුණ තරග නොකරන බව එහි නායක හිටපු පාර්ලිමේන්තු මන්ත්‍රී විමල් වීරවංශ මහතා පවසනවා.
විශේෂ නිවේදනයක් නිකුත් කරමින් ඔහු මේ බව සඳහන් කර තිබෙනවා.
ජනතා විමුක්ති පෙරමුණේ අතීත උරුමයට අයිතියක් ඇති සහ ඊට ගරු කරන දේශපාලන ව්‍යාපාරයක් ලෙස ජනාධිපතිවරයා බලයට පත් කළ ජනවරම ආරක්ෂා කිරීමට පෙනී සිටින බවයි එහි දැක්වෙන්නේ.
ඒ සඳහා පාර්ලිමේන්තුව තුළ සිට කරන භූමිකාවට වඩා ඉන් පිටත භූමිකාව වඩා වැදගත් හා බලවත් වියයුතු බව පක්ෂයේ අදහස බවයි ඔහු සඳහන් කර ඇත්තේ.
ඒ හේතුවෙන් ඉදිරි පාර්ලිමේන්තු මැතිවරණයේ දී ජාතික නිදහස් පෙරමුණ පක්ෂයක් ලෙස සන්ධාන ගතව හෝ ස්වාධීනව තරග නොකරන බවත් මෙය පක්ෂයේ සාමූහික තීරණයක් බවත් ඔහු මහජනතාවට දැනුම් දෙනවා.
අනුර දිසානායක ජනාධිපතිවරයා දෙවන – ගෝඨාභය බවට පත්කිරීම සඳහා රටට හතුරු අධිරාජ්‍ය න්‍යාය පත්‍රයට සේවය කරන යම් විපක්ෂ බලවේගවලට උවමනාවක් තිබෙන බවට සැකයක් නොමැති බවත්, තම පක්ෂය එම උවමනාව නියෝජනය කරමින් රට තවදුරටත් අර්බුදයට ගොදුරු කිරීමට දායක නොවන බව ද ඉතා වගකීමෙන් යුතුව පවසන බව විමල් වීරවංශ මහතා වැඩිදුරටත් සඳහන් කරයි.