රන්ජන් ජනපතිගෙන් ඉල්ලීමක් කිරීමට සූදානමින් !

හිටපු පාර්ලිමේන්තු මන්ත්‍රී සහ රංගන ශිල්පී රන්ජන් රාමනායක ජනපති අනුර හමු වී විශේෂ ආයාචනාවක් සිදු කරන බව පසුගියදා දන්වා තිබුණා.

ඒ අනූව අධිකරණයට අපහාස කිරීමේ චෝදනාව මත සිරගතව සිට හිටපු ජනාධිපති රනිල් වික්‍රමසිංහ විසින් 2022 වසරේදී කොන්දේසි සහිත සමාවක් දුන් තමන්ට පූර්ණ සමාව ලබාදී තම ප්‍රජා අයිතිය නැවත ලබා දෙන ලෙස රන්ජන් රාමනායක වත්මන් ජනාධිපති අනුර කුමාර දිසානායකගෙන් ඉල්ලීමක් කරන බව පවසා තිබුණා.

“මගේ ප්‍රජා අයිතිය නැවත ලබාදෙන ලෙස ඉල්ලා මම නුදුරේදීම වත්මන් ජනාධිපති දිසානායකට ආයාචනයක් කරනවා. හිටපු ජනාධිපතිතුමා මට සමාව දුන්නා. එහෙත් ක්‍රියාකාරී දේශපාලනයේ යෙදීමට බාධා කරමින් මගේ කට වසා තිබෙනවා. මගේ ප්‍රජා අයිතිය වෙනුවෙන් මම නව ජනාධිපතිවරයාට අලුත් ආයාචනයක් කරනවා. කිසිම අපරාධයකට මාව හිරේට යවපු නැති නිසා මට ඒක ලැබෙයි කියලා හිතෙනවා,” යනුවෙන් පහු ප්‍රකාශ කර තිබේ.

2017 අගෝස්තු මාසයේ අරලියගහ මන්දිරයෙන් පිටතදී තමන් කළ ප්‍රකාශය සම්බන්ධයෙන් 2022 අගෝස්තු 25 වැනි දින අධිකරණයට දිවුරුම් ප්‍රකාශයක් ඉදිරිපත් කරමින් රාමනායක, තමාගේ ප්‍රකාශය අගවිනිසුරුට සහ සමස්ත අධිකරණයට මුළුමනින්ම අවඥාවක් බව පිළිගත්තේය.

රාමනායක සිය දිවුරුම් ප්‍රකාශයෙන් සමස්ත අධිකරණයෙන් ද දැඩි ලෙස සමාව ඉල්ලා සිටියේය.

තවද, 2017 අගෝස්තු 21 වැනි දින තමන් කළ ප්‍රකාශය ඉල්ලා අස්කර නොගන්නා බවට ශ්‍රේෂ්ඨාධිකරණ පරිශ්‍රයෙන් පිටතදී කළ අපහාසාත්මක ප්‍රකාශය සම්බන්ධයෙන් සමාව අයැද සිටි ඔහු, නැවත කිසි දිනෙක තම මුළු ජීවිත කාලය තුළම එවැනි දෙයක් නොකරන බවට සහතිකයක් ද ලබා දුන්නේය.