රජයෙන් දී ඇති වාහන නැවත ලබාගත හොත් බස් රථයෙන් යෑමට කිසිඳු ලැජ්ජාවක් නොමැති බවත් තමන් වෙනත් කිසිවකුගෙන් යැපෙන කෙනෙක් නොවන බවත් හිටපු ජනාධිපතිනී චන්ද්‍රිකා බණ්ඩාරනායක කුමාරතුංග මහත්මිය අද (30) පැවසුවා.
තමන් වෙනත් පුද්ගලයන්ට දුන්නා මිස කාගෙන්වත් ලබාගෙන නොමැති බව කී කුමාරතුංග මහත්මිය ජනාධිපති ධුරයෙන් ඉවත්ව යන විට ඇත්ත වශයෙන්ම සිය බැංකු ගිණුමේ සල්ලි නොතිබුණු බව ද සඳහන් කළා.
මහින්ද රාජපක්‍ෂ පාලන කළ වසර නවයේ විශ්‍රාම වැටුප ද නොලැබුණු බවත් සිය සේවක මණ්ඩලයේ වැටුප්, විදුලි සහ වතුර බිල් ගෙවන බවත් ඇය කීවා.
රජයෙන් දුන් නිවස සහ වාහන හතරක් මේ වන විට පාවිච්චි කරන බවත් ජීප් එක සහ කාර් එකක් ගමන් සඳහා ද, ආරක්‍ෂාවට වාහන දෙකක් යොදාගෙන ඇති බවත් හිටපු ජනාධිපතිනී චන්ද්‍රිකා බණ්ඩාරනායක කුමාරතුංග මහත්මිය වැඩි දුරටත් පැවසුවා.