ජනාධිපති ලේකම් කාර්යාලය අසල ගාල් කර ඇති රජයේ වාහන, ජනපති අනුර කුමාර දිසානායක මහතාගේ උපදෙස් පරිදි අත්‍යවශ්‍ය සේවා සඳහා ලබාදීමට කටයුතු කරන බව ජනාධිපති කාර්යාලය පවසනවා.
එමෙන් ම ජනාධිපති ලේකම් කාර්යාලය අසල ගාල් කර ඇත්තේ ජනාධිපති ලේකම් කාර්යාලය තුළ සියලු වාහන ගාල් කිරීමට ඉඩකඩ නොමැති නිසා බවත් කිසිසේත් එය ප්‍රදර්ශනය කිරීමේ අරමුණින් නොවන බවත් ජනාධිපති කාර්යාලය දැනුම්දී තිබෙනවා.
ජනාධිපති කාර්යාලය පෙන්වා දෙන්නේ පසුගිය දින කිහිපය තුළ සිදුකළ දැනුම්දීම පරිදි ජනාධිපති කාර්යාලය වෙත භාර දී ඇති වාහන 107ක් මේ වන විට ජනාධිපති කාර්යාලයෙන් පිටත පොලිස් ආරක්ෂාව යටතේ තාවකාලිකව ගාල් කර තිබෙන බවයි.
මෙම වාහන ජනාධිපති ලේකම් කාර්යාලයේ නිත්‍ය කාර්ය මණ්ඩලය වෙත ලබාදී තිබූ රථ වාහන නොවන බවත් එම වාහන හිටපු ජනාධිපතිවරයා විසින් සිය ධූර කාලය තුළ සිය පෞද්ගලික කාර්ය මණ්ඩලය වෙත ලබාදී තිබූ වාහන බවයි ජනාධිපති කාර්යාලය පෙන්වාදෙන්නේ.
එසේම මෙලෙස බාරදෙන ලද වාහනවල සම්පූර්ණ ලැයිස්තුවක් ද මේ වන විට මාධ්‍ය වෙත නිකුත් කර තිබෙනවා.
