එළඹෙන ජනාධිපතිවරණයේ සමගි ජන බලවේගය ජනාධිපති අපේක්ෂක සජිත් ප්‍රේමදාසට සහාය දීමට ඉලංගෙයි තමිල් අරසු කච්චි පක්ෂය ගත් තීරණය පිළිබඳ පක්ෂ අභ්‍යන්තරයේ මතභේදාත්මක තත්වයක් ඇතිකර තිබෙනවා.
සජිත් ප්‍රේමදාසට සහය දීමට තීරණය කළ බව මධ්‍යම කාරක සභාව තීරණය කළ බව එම පක්ෂයේ මාධ්‍ය ප්‍රකාශක පාර්ලිමේන්තු මන්ත්‍රී එම්. ඒ. සුමන්තිරන් ප්‍රකාශ කළ ද එම තීරණය සම්බන්ධව තමන් කිසිවක් නොදන්නා බව ඉලංකෙයි තමිල් අරසු කච්චි පක්ෂයේ නායක මාවෙයි සේනාධිරාජා ප්‍රකාශ කරනවා.
මාවෙයි සේනාධිරාජා පැවසුවේ අසනීප තත්ත්වයක් නිසා අද පැවති පක්ෂ මධ්‍යම කාරක සභා රැස්වීමට සහභාගී වීමට නොහැකි වූ බවය. එහි ගත් තීරණ සහ සාකච්ඡා කළ කරුණු පිළිබඳ තමන් නොදැනුවත් බව ද ඔහු පවසනවා.
ඉලංකෙයි තමිල් අරසු කච්චි පක්ෂය දෙමළ ජතික සන්ධානයේ ප්‍රධානම පක්ෂය වූ අතර මෙම සන්ධානය තුළ ඇති වී තිබුණු ගැටලු මගහරවාගෙන එය එක මිටක පවත්වා ගැනීමට ආර්. සම්පන්දන් මන්ත්‍රීවරයා දැරූ ප්‍රයත්නය ඔහුගේ අභාවය සමග අවසන් වූ අතර දෙමළ පොදු අපේක්ෂකයා ඉදිරිපත් කිරීමට රනිල් වාදී විග්නේෂ්වරන්ගේ මූලිකත්වයෙන් ගත් ප්‍රයත්නයෙන් පසු ද්‍රවඩි ජාතික සන්ධානය විසිරී ගියා.
ටී.එන්.ඒ මව් පක්ෂය වූ ඉලංකෙයි තමිල් අරසු කච්චි පක්ෂය පමණක් දෙමළ පොදු අපේක්ෂකයා ලෙස ජනාධිපතිවරණයට නාමයෝජනා ලබාදුන් පී. අරියනේත්‍රන් ට සහාය නොදී සිටීමට තීරණය කර තිබිණි. සන්ධානයේ අනෙක් පක්ෂ දෙමළ පොදු අපේක්ෂකයාට සහාය දීමට එක් වුණා.
මේ වනවිට ඉලංකෙයි තමිල් අරසු කච්චි පක්ෂයේ නායකත්වයත් එහි මාධ්‍ය ප්‍රකාශකවරයාත් අතර ද ගැටුමක් ඇති වී තිබෙනවා.