මහජන ආරක්ෂක අමාත්‍යාංශයේ ඊයේ (29) පැවති විශේෂ මාධ්‍ය හමුවකට එක් වෙමින් ජනාධිපතිවරණ මැතිවරණ රාජකාරී සඳහා පොලිස් නිලධාරීන් 54,000 ක් යොදවන බව ප්‍රජා පොලිස්, සංචාරක, ආයෝජන සහ මැතිවරණ භාර ජ්‍යෙෂ්ඨ නියෝජ්‍ය පොලිස්පති අසංග කරවිට පැවසීය.
දිවයින පුරා ස්ථාපිත 13,000 කට වැඩි ඡන්ද මධ්‍යස්ථාන සහ 45 කට වැඩි ඡන්ද ගණන් කිරීමේ මධ්‍යස්ථාන සහ මැතිවරණ කාල සීමාව තුළ ක්‍රියාත්මක කෙරෙන ජංගම රථ 3200 ක් සඳහා පොලිස් නිලධාරීන් යෙදවීමට බලාපොරොත්තු වන බවයි ඔහු පැවසුවේ.
ජනාධිපති අපේක්ෂකයන් තිස් අට දෙනා පිළිබඳව බුද්ධි වාර්තා මේ වන විටත් ලබාගෙන ඇති අතර එම බුද්ධි වාර්තාවලට අනුව ඒ ඒ අපේක්ෂකයන්ට ඇති තර්ජන වල තක්සේරු අනුව පොලිස් නිලධාරීන් 260 ක් ඔවුන්ගේ සෘජු ආරක්ෂාව සඳහා යොදා ඇති බවද ඔහු පැවසුවා.
යම් තර්ජනයක් සහිත අපේක්ෂකයන් පවත්වන රැස්වීම් සඳහාද පොලිස් ආරක්ෂාව ලබාදීමට මේවන විටත් කටයුතු කර ඇති බව ජේෂ්ඨ නියෝජ්‍ය පොලිස්පති අසංග කරවිට තවදුරටත් දන්වා සිටියා.