උදේ අත්අඩංගුවට ගත් ශිරාන් බාසික්ගේ පුත්‍රයාට හවස ඇප !

අද උදෑසන අත්අඩංගුවට ගත් මෙරට මහා පරිමාන මත්ද්‍රව්‍ය ජාවාරම්කරුවෙකු ලෙස සැළකෙන ශිරාන් බාසික් ගේ පුත්‍රයාවන නදීන් බාසික්ට ගල්කිස්ස මහේස්ත්‍රාත් අධිකරණයෙන් ඇප ලබා දී තිබෙනවා.

ඒ විදේශ ගමන් තහනමක් පැනවීමෙන් පසුවයි.

අද උදෑසන ඩුබායි රාජ්‍යයේ සිට මෙරටට පැමිණි අවස්ථාවේදි කටුනායක ගුවන්තොටුපලේදී ඔහුව අත්අඩංගුවට ගනු ලැබුවා.

පසුගිය පෙබරවාරි 16 වනදා වැල්ලවත්ත ප්‍රදේශයේ දී නදීන් බාසික් සහ අංගොඩ ප්‍රදේශීය සභාවේ හිටපු මන්ත්‍රීවරයෙකු ගමන් කළ මෝටර් රථය මාර්ග රාජකාරියේ නිරතව සිටි විශේෂ කාර්ය බලකා නිලධාරියෙකු අනතුරට පත් කර පළා ගොස් තිබුණා.

ඒ ඔවුන් ගමන් කළ රථය නවත්වන ලෙසට අණකල අවස්ථාවේදි නොනවත්වා ධාවනය කරමින්. එහිදී පොලිස් යතුරුපැදියකට ද අලාබ හානි සිදු වුණා.

පසුව හිටපු ප්‍රදේශීය සභා මන්ත්‍රීවරයා පොලිස් විශේෂ කාර්ය බලකාය විසින් අත්අඩංගුවට ගනු ලැබූ අතර එම ස්ථානයේ තිබූ රන් පවුම් 100ක්, මෝටර් රථ 03ක යතුරු හමුවුණා.

අදාළ මෝටර් රථ පරික්ෂා කිරීමේ දී හෙරොයින් ග්‍රෑම් 19ක්, ජංගම දුරකතනයක්, ලැප්ටොප් පරිගණකයක්, විදේශ මුදල් තොගයක්, නදීන් බාසික්ගේ නමට තිබු රියදුරු බලපත්‍රයක්, ඩුබායි රාජ්‍යයේ නිකුත් කර තිබූ හැදුනුම්පතක් සහ රියදුරු බලපත්‍රයක් ද සොයාගනු ලැබුවා.

මේ සම්බන්ධයෙන් තොරතුරු පොලිස් මත්ද්‍රව්‍ය නාශක කාර්යාංශයට සහ නීති විරෝධි වත්කම් විමර්ශන අංශයට භාර දී තිබූ අතර, ඒ අනුව නදීන් බාසික් ඩුබායි සිට කටුනායක පැමිණි අවස්ථාවේ දී මිනී මැරීමකට තැත්කිරීම සහ රිය අනතුරක් සිදු කර පළායෑමේ චෝදනාව මත වැල්ලවත්ත පොලිස් අත්අඩංගුවට ගනු ලැබුවා.